February ni 1 a Port Said,Egypt-a football inkhelnaa buaina chhuak chu football khawvel chanchin a thil thleng rapthlak ber pawl leh theihnghilh tawh ngai loh tur a ni. Egypt-a he buaina hian zual lam pan zelin, ram pum a chiah hneh hle a, an khawpui ber Cairo pawh he a kangkai tawh a ni. He buaina chhuah chhan (HETAH hian click rawh) hi club in hal tak, al-Ahly leh al-Marsy te inkhelh zawh aṭanga chhuak niin, home team al-Marsy te 3-1 in chak mah se al-Ahly players te khawih tumin al-Marsy fans te field chhungah an rawn tlan lut a, tah hian al-Ahly fans te rawn tlan lut ve in an in nek buai ta a ni.

He thil ah hian mi 74 in nunna chan tawhin, mi za tel in hliam an tuar bawk a, a then chu an in nek buainaa chil hlum te, thawchham avanga thi te leh vih hlum te an ni hlawm. He thil thleng avang hian mipui thinrimin an khawpui chhung Cairo-ah lungawi lohna an lan tir nasa hle a, mi tam tak pawnah chhuakin Tahrir Square-ah he lungawi lohna hi an lan tir a ni. Heng mipui tam zawk te hi al-Ahly fans leh Zamalek fans te an ni tlangpui bawk. al-Ahly fans ruhkawl ‘Ultras’ te chuan he buaina chhuah chhan ah hian thuneitute puhin, nikum lawka an President paihthlak tak, Hosini Mubarak a paihthlakna kawnga Ultras ho an inhman nasat avanga phuba lak nan an rawn hmang niin an puh bawk. al-Ahly fans pakhat chuan he buaina hi football vang ni lovin, politics thil a inphiarrukna avanga thleng a ni a ti bawk.

Mipui thinrim pungkhawm chuan Interior Ministry building pawn lamah nawrhna lantirin, tah hian security force ho nen in nawr buaiin mipui hian security force te beih nan lung an vawm a, hemi vang hian mipui hnawhdarh nan security force lam hian tear gas an hmang a ni. Mi 1000 chuang in hliam an tuar tawh bawk a, Seuz ah pawh police station chu mipui za tel in luhchhuah an tum avangin mi pahnih kahhlum an ni bawk. He thil thleng avang hian Egyptian Football Association officials leh Port Said Director of Security te chu Prime Minister in a ban nghal bawk. He buaina hian ziaawm lam a la pan mai dawn rih lo niin a lang.

FIFA president Sepp Blatter chuan nunna chan ta chhungte a tawrhpui thu sawiin, he ni hi football khawvel tan chuan ‘Black day’ ti hial in, he’ng thil rapthlak tak a thlen tawh loh nan theihtawp kan chhuah tur a ni a ti bawk. He thil thleng chungchang hi FIFA chuan a report kimchang rawn thehlut turin Egypt Football Federation (EFA) chu a hriattir nghal bawk a. Amaherawhchu EFA official te ban an nih nghal vek si avangin report hi engtika FIFA kut a thleng tur nge a nih hriat a ni lo.