Kan nghak a, kan nghakchhuak dawn ta e. English Premier League awm loh avanga kârtawpa khawhar ṭhin EPL fans te kan khawhar tawh dawn lo. London-a buaina chhuak avangin Tottenham leh Everton te inkhel tur postpone mahse kartâwp-ah Manchester United, Arsenal, Chelsea, Liverpool leh Manchester City te inkhel kan en leh thei dawn ta. EPL season hnuhnung ber i en laite kha han ngaihtuah lêt la, hlim taka i enpui ṭhinte nen khan in enho leh thei dawn em le?

Tunkar-ah hian match pakua a awm dawn a, match ṭhenkhatah chak tur zawk a rin theih mai a, chutihlaiin rin ngaihna awm mang lo pawh a awm. Top 6 team bikah chuan hetiang hian ka han ring chhin a, ZoFooties ten in rin dan rawn sawi ve teh u.

Newcastle United 1-2 Arsenal (Inrinni 10:00 pm IST)

Hei hi EPL 2012 round 1 a en chakawm ber a ni awm e. Season hmasa khan he fixture ah hian ‘game of the year’ tih theih tura chhinchhiahtlak kan hmu a, 4-0 a Arsenal in hma an hruai hnuaNewcastle in 4-4 in an rawn pawtthla leh a nih kha.

Nipui transfer-ah team pahnihte an che ṭha vak lo ve ve a, Newcastle United in captain Kevin Nolan leh Jose Enrique te an chân a, Arsenal in captain Fabregas an hloh hmel bawk. Player thar lei mahse fans te beisei angin an inla ṭha lo a tihtheih awm e. Hei vang tak hian he game hi a pawimawh a, fans te hnenah ‘Kan la ṭha tawk e’ tih an lantirna remchang tak a ni ang.

Season tira che ṭha ṭhin Arsenal hian player an nei ṭha zawk ngei mai a, Newcastle United in St JamesPark a tlâwm an hreh viau ang. Game inhnehtawk takah Arsene-a nau te hi an chungnun zawk ka ring e.

 Liverpool 2-1 Sunderland (Inrinni 8:30 pm IST)

EPL team zingah nipui bazar-a buai ber chu Liverpool leh Sunderland te hi an ni. Liverpool in Adam, Henderson, Doni, Enrique  leh Downing te an lei a, Sunderland hian player 9 ngawt an neih belh bawk. Hei vang hian he game hi en a chakawm a, player thar te hi engtin chiah nge an inrem ang? Round 1 aṭanga khelho turin an inman tâwk tawh em tihte chu naktuk zanah kan hmu ang.

Sunderland player ‘hlui’, Sunderland fans ni bawk Henderson tan he game hi a ‘special’ dawn a, a khelpha ngei angem tih erawh hriatthiam a har. Nidang ang bawkin Anfield-ah Kop ho an bengchheng leh dawn a, midfield ah Liverpool in game an thunun a rinawm a, Sunderland defender te tân Caroll, Downing, Suarez (a start lo maithei) te ho danchah hi a har mah mah ang.

West Brom 0-2 Manchester United (Pathianni 11:00 pm IST)

Season hmasa khan ManUtd hi khualmualah vawi 5 chiah an chak a, an hneh zingah West Brom hi an tel. Player thar ṭha tak tak an nei a, pre-season ah pawh an che ṭha hle. Nani leh Young te a sir tawn tawnah an hlauhawm zia kan hmu tawh a, Rooney leh Berba (?) te khelh fuh ni a nih a, Community Shield-a an game ang kha an khel leh thei a nih ngat chuan ManUtd hi chak chiang turah ka ngai.

Roy Hodgson a luh hnuah West Brom hi khelh an har zek zel a, season hmasa-ah pawh The Hawthorns ah hian Liverpool hnehin Arsenal leh Liverpool an draw thei a ni. Discipline ṭha tak hnuaiah United hmatâwngte lo dan beh an tum dawn a, counter attack-ah an innghat ang.

Game hmuhnawm tak ka beisei a, champion lai ManUtd hi an chak ka ring e.

Stoke City 0-1 Chelsea (Pathianni 7:00 pm IST)

Chelsea manager Andre Villas-Boas hian a duh thlang thei se, Premier League-a a game hmasa ber atan Stoke City away game hi a thlang hauh lo ang. Britannia Satdium-ah Chelsea fiah an ni dawn a, EPL a game ‘pa’ ber Stoke City hian an mikhual te hi an dim lo leh viau maithei.

An pahniha an intum tawhah Chelsea hi a chaklo zawkah an la ṭang ngai lo a, chumai bakah a zawnin kum kaw (9) chhung chu EPL opening game ah an la chak ziah bawk. Hei mai a ni lo, kum 1998 hnulamah opening game ah chakloh an la nei miah lo. Stoke City hi Europa League khel tura inpet tling hlim an ni a, an ‘confi’ hle a rinawm. Tlarhnungah Upson leh Woodgate an lei thar a, goal thun aiin goal venhim an ngaihpawimawh zawk a rinawm.

Game rum tak ka beisei a, record enin player nei ṭha zawk Chelsea 1-0 a an chak ka ring.

Manchester City 3-0 Swansea City (Thawhlehni 1:30 am IST)

Community Shield ah chaklo zawk ni mahse Manchester City player neih ṭhat zia hi hmuhhmaih theih a ni lo. Football expert te chuan Arsenal leh Liverpool aia thleng sâng turah an dah der tawh. Champions’League khel thei turin an inpet tling tawh a, season tharah champion an tum. Tlarhmâ-ah Aguero an neih belh tawh a, a ni hi a khelh ngei a beiseiawm. A khel thei lo a nih pawhin Tevez, Dzeko te ho an la awm e.

Kaithar Swansea City hi an khel ka la hmu tam lo a, EPL-a an game khatna-ah City of Manchester stadium an tlawh nghal dawn. Championship ah chuan attacking football hmuhnawm tak an khel ṭhin a, mahse Manchester City te han hneh nghal tur chuan rin ngam an harsa rih.

Mahni venga khel tur an ni bawk a, player nei ṭha Man City hi chiang taka an chak ka ring e.

The Rest

QPR 2-2 Bolton Wanderers (Inrinni 8:30 pm IST)

Blackburn Rovers 2-1 Wolves (Inrinni 8:30 pm IST)

Fulham 1-0 Aston Villa (Inrinni 8:30 pm IST)

Wigan Athletic 1-1 Norwich City (Inrinni 8:30 pm IST)