English Premier League club ten player thar an leibelh zel a, thuthang tam tak zinga confirmed transfer i han thlir thuak thuak teh ang.

• English club lian ber te zinga mi ni thin, tunhnaia hnungtawlh hret Newcastle United an tang kher mai. Striker tlanchak, tharum ngah leh pet goal thei Demba Ba chu West Ham United atangin an lei. Magpies ho hian an la duhtawk mai lo a, Rennes atangin French midfielder Sylvain Marveaux chu kum 5 chhung atan contract an ziahpui bawk. Marveaux leh Ba te hian free transfer ve ve in Newcastle hi an zawm a ni. Newcastle United hian January thla khan an striker chhuanvawr Andy Caroll an hralh tawh a, hmanni lawkah an captain Kevin Nolan an hralh bawk. Fans leh player thenkhat te an thinur a, player tha an hralh zel chu an hrethiam lo. Mahse tunah chuan player duhawm tak tak an la lut thar tawh a, Ba leh Marveaux bakah hian French midfielder tho Cabaye chu an la tawh bawk a ni. Caroll leh Nolan te hmunruak hnawhkhat zo tak ang maw?

• English Premier League a season khatna hmang tura inpuahchah mek Norwich City an awm mai mai bik lo a, Manchester United defender Richard da Laet chu season khat chhung atan loan in an la. Defence a lai leh a sir a khel thei ve ve da Laet hi ManUtd first team ah pawh khel pha ve thin a ni a, a experience hi Norwich City tan chuan thatpuina tham a ni ve tawh a ni.

• Player mai a ni lo, transfer season ah meuh chuan manager pawh an inthlak nawk mai. Alex McLeish chu Aston Villa manager thar a ni dawn a, kum 3 chhung atan contract an ziakfel. Birmingham City manager hlui McLeish hian kum khatah 2 million pounds a hlawh dawn a ni.