EURO 2020 : Turkey leh Italy inkhel tur thlirlawkna

Zanin zanlai pelh dar 12:30 hian Rome khawpuiah Turkey leh Italy te’n Euro 2020 an khuh hawng dawn. Hrileng vang kum khat zet sawn tlai a nih hnuah Euro khelh a ni dawn ta a, khawvelin a ngaihven.

SULHNU

Euro bik a ram pahnih te sulhnu en chuan hnial rual lohin an inthlau a, Italy in sulhnu an nei tha zawk. Euro chauh ni lo in international football – a vawi 11 an inhmachhawn tawhah Azzurri an la tlawm ngai lo.

Turkey hian Euro hi vawi 4 chiah an la khel a, 1996, 2000, 2008 leh 2016 te khan a ni. Euro 2000 – ah khan Quarter-finals an thleng a, Euro 2008 khan semi-final thleng bawkin hei hi an tawn san ber a la ni. A pumpuiah game 15 khelhah vawi 4 chakin tum hnih an inhnehtawk a, vawi 9 an tlawm. Kumin hian Qualifier – ah vawi 10 khelin vawi 7 an chak a, vawi khat chiah an chak lo.

Italy ve thung hi 1968 – ah khan champion in 2000 leh 2012 – ah te Runners-up an ni bawk. Euro hnuhnung ber 2016 khan Quarter-finals an lut bawk a ni. Euro – ah hian a pumpuiah game 38 khel tawhin vawi 16 an chak a, vawi 16 bawk inhnehtawkin tum 6 an tlawm tawh. Euro 2020 Qualifier – ah khan team vawi 10 khelhah chak vekin goal 37 an thun a, goal 4 chiah an chhuah.

THE BOSS

Turkey enkawltu Şenol Güneş hi an ramah chuan ‘legend’ tling pha a ni a, kum 69 mi a ni. Footballer hlawhtling a nih hnuah Besiktas chu Turkish Super Lig nomawi vawi hnih a chawipui tawh a, an rama club lar Bursaspor leh Trabzonspor te pawh a enkawl tawh. Kum 2000 – 2004 chhung khan Turkey national team hi enkawl tawhin 2002 FIFA World Cup – a Turkey pathumna nihpui tu kha a ni. Kum 2019 atang khan an ram team enkawl lehin Qualifier – ah team tha France in vawi hnih an hmachhawn a, an hneh thei lo !

Italy hi football khawvela manager lar Roberto Mancini ho a rawn thawkchhuak tur an ni a, ani hi tunhnaia Italy team dinthar lehtu ang hial a ngaih a ni. Club football – a Mancini record neih thatzia leh nomawi a chawi tawh te sawi belh a ngai lo a, mahse national team erawh tun hi a vawi khat enkawlna a ni. Kum 56 – a upa hian ram leh ram inelna hi a la hmachhawn ngai lo a, Qualifier – a an chet dan en erawh chuan a champion pui a nih pawhin thil mak a ni lo ang.

INNGHAHNA :

Turkey tan an captain kum 35 a upa Burak Yilmaz hi an player langsar ber tih ngam a ni a, ani hian Ligue 1 champion Lille tan tun season khan goal 18 a thun. Tlarhnunghah hian Leicester City defender Çağlar Söyüncü bakah Juventus tana khel pha zeuh zeuh Merih Demiral an nei a, midfield – ah chuan Milan player Hakan Çalhanoğlu hi an innghahna tur a ni. Turkey hi team chhia an ni lo a, amaherawhchu an group – ah hian anmahni tiatpui Wales leh Switzerland an awm ve avangin vawi khat chetsual zeuh pawh a pawi thei ang.

Italy hian tum dang a kan hriat lar thin player kawl tam tawh lo mahse team khawng tak an la ni reng. Siban nghak turin tawnhriat nei tha Salvatore Sirigu leh kum 22 mi lek Gianluigi Donnarumma te an awm a, a kum naupang zawk hi kan hmuh ngun zawk a rinawm.

Euro 2012 final an luh theih nan a Leonardo Bonucci leh Giorgio Chiellini te inkawp fuhzia kha theihnghilh theih a ni lo a, tunah erawh an kum a tam ve ta tih hriat tel a ngai. PSG midfielder Marco Verratti la dam lo mahse Champions League champion Jorginho an nei a, Serie A Best Midfielder ni lai Nicolò Barella an kawl bawk. Tlarhmaa an player Lorenzo Insigne, Federico Chiesa, Ciro Immobile leh Federico Bernardeschi te hi an khelh that ni chuan team chakpui thei khawp a player tha vek an ni.

Game 27 hneh loh nei lo a kaltluang tawh Italy nge, rawlthar rual Turkey tih chu zaninah a chhanna kan hmu dawn e.