EUROPEAN SUPER LEAGUE A PIANG !

Nizanah football khawvel sâwinghing hat khawp thuthar kan hria a, chu chu Europe a club lian ṭhenkhat intelkhawmin league hran an siam chungchang a ni.

Club 12 – AC Milan, Arsenal, Atletico Madrid, Chelsea, Barcelona, Inter Milan, Juventus, Liverpool, Manchester City, Manchester United, Real Madrid leh Tottenham Hotspur te chuan Europe a club liante inelna tur intihsiakna hran European Super League din an remtih thu thuchhuah inṭawm an siam a, hei hi sawizui a hlawhin dodaltu a ngah nghâl hle.

Hetiang hian European Super League (ESL) khelh dân tur ruahmanna an siam –

•ESL ah hian club 20 an inel ang a, a dintu club 15 (club hming tharlan 12 bâkah hian 3 dang an la awm dawn) bâkah club dang 5 in inelna an nei ang. Club dang 5 te hi season liamta a an result a zirin ESL ah hian an tel ang.

•Midweek ah ramchhung inkhel tibuai lova inkhelh tur a ni ang.

• August aṭangin ESL hi khelh ṭan a ni ang a, group hnihah club 10 ve ve in ṭhen a ni ang. League in group inelna hi kalpui a ni ang a, home leh away a khel tur niin table a a sâng 3 ten quarter-final an lut ang a, group pahniha 4-na leh 5-na ten home leh away a intumin quarter-final a lut tur an zawng ang.

• Quarter-final hi home leh away a khelh tur niin final hi May ah neutral ground a khelh tur a ni ang.

• ESL hi season thar lo awm tur aṭanga ṭan tur ni a sawi a ni.

ESL hruaitu turte hetiang hian ruat niin chanchinbu hrang hrangte chuan an ziak –
Chairman: Florentino Perez [Real Madrid]
Vice-Chairman: Stan Kroenke [Arsenal]
Vice-Chairman: Andrea Agnelli [Juventus]
Vice-Chairman: John W. Henry [Liverpool]
Vice-Chairman: Joel Glazer [Manchester United]

Thuthang awmah chuan British media company lian DAZN chuan ESL inkhel hi live a pekchhuah turin $3.5 billion in TV rights lei an inhuam a. Tin American investment company lian JP Morgan chuan €6 billion invest an inpeih a, chumi bakah chuan company lian tak takin ESL ah hian sum vawm an hreh lo hle niin an sawi a.

Chanchinbumite chuan ESL a khel tur clubte hi ESL buatsaihtute chuan an tel manah €350m pêk an intiam niin an sawi bawk a ni.

European Super League chungchangah hian FIFA chuan thuchhuah siamin hetia khawvel puma mumal taka thil kal sa aṭanga inla hranga Europe a club liante intihsiakna siam hi an pawm loh thu an tarlang a, lungrual taka khawvel puma football a kal theihna tura hma an lâk zel tur thu an thuchhuahah hian an ziak tel bawk.

Tun dinhmunah chuan France leh Germany a clubten ESL hi an zawm rih lo va, Netherlands football thuneitute pawhin zawm an tum loh thu an sawi tawh bawk.

UEFA chuan ESL a lo pian chungchangah hian vauna ti chhuakin ESL a tel clubte chu Europe a intihsiakna a tel a rem loh maitheih bâkah ram intihsiaknaah pawh ESL a khel playerte chu tel an rem ti lo maithei tih thu thuchhuah an siam a ni.

ESL chungchang hi sawi tur leh titi a la tam dawn chauh a, post khata sawi zawh vek theih thil a nih loh avangin thu thar awmte post hranin kan siam zel mai dawn nia.