Match hmasa berah Arhima FC 3-1 ngawtin hneh lo mah se Aizawl FC chuan an match hnihnaah Bhawanipore FC chu 2-1 in an hneh ta a ni.

Inkhelh tantirh phat atang AFC hian an nawr nghal a, Winger Rammawia, ITI chuan uihawm takin a missed nghal a ni. Game pawh a tang chho zel a. Rammawia tho hian minute 30-ah ball tha tak a cross lut a, striker Michael-a chuan a lo head goal a ni. Minute 39-ah AFC Captain David-a chuan box pawn atang mawi lutukin keeper dinglamah a pet goal a, AFC hian 2-0 in hma an hruai a ni.

Second half-ah double yellow vangin AFC Ghanaian defender Sumaila Safianu chu hnawhchhuah a ni a, penalty an chawi bawk a ni. Penalty atang hian Bhawanipore FC lam hian goal 1 an rawn thun ve a. Hemi hnu hian Bhawanipore FC lam hi an rawn tang thar a, game pawh an rawn thunun khawp mai. Mahse AFC lam hi 10 chauhvn khel mah se game an fight thei hle a, Bhawanipore FC lam hian clear chance pawh an nei meuh lo a ni. A tawp thlengin AFC lam hian goal an humhim thei a, tihian point 3 an hlawhchhuak ta a ni. Karkeh thawlehni hian Silchar-ah tho Eagles FC an tum leh ang.

ZoFooty chuan Manager Hmingthana kan be fuh thei hlauh a. Manager chuan “First match chak lo kan ni tih hre rengin match an khel a, hei vang hian chak ngei an tum a, players te pawh an tang hle a, kan chak ta a ni” a ti. An players te chu fighting spirit an neithat zia thu leh red card an hmuh hnuah pawh chance an neih theih thu a sawi a. Tin, hmun hrang hranga an team support tute leh anmahni tawngtaipui tute chungah lawmthu a sawi bawk a ni.