Joachim Löw hun a tawp ta

Euro 2020 atanga pet chhuah an nih takah chuan Germany manager Joachim Löw chuan a lo sawi lawk tawh angin Germany national team enkawl hna a chawlhsan dawn ta. Kum 61 a upa Löw hian kumin March thla khan Euro zawhah a hna hi a chawlhsan tur thu a lo sawi tawh a ni. “Kum 15 zet mawhphurhna sang tak neiin ka awm a, tunah chuan chawlh hahdam rih ka mamawh e,” tiin inkhelh zawhah a sawi a, hna thar neih nghal mai a tum lo.

Löw hian kum 2006 khan Jurgen Klinsmann zawmin Germany assistant manager a ni tan a, 2006 World Cup ah pathumna an nihpui. World Cup zawha Klinsmann’n contract thar a ziah tak loh avangin Löw hi manager nghet atan lak a ni a, Euro 2008 final luhpuiin hemi tuma a assistant chu tuna amah thlaktu tur Hansi Flick hi a ni.

2010 World Cup Qualifier – ah hneh loh nei lo in an inpettling a, senior player leh captain kumhlun Michael Ballack a ko duh tlat lo erawh chuan sawi a hlawh hle. Senior player tam tak thlauh thla in naupang zawk leh tawnhriat la nei tlem- Mesut Ozil, Sami Khedira leh Thomas Muller te a ring lui tlat a, a ti sual lo. 2010 World Cup semi-final ah hian champion zui ta Spain 1-0 in an hneh lo a, pathumna nih inchuh inkhelah Uruguay hnehin bronze medal an hawn.

Euro 2012 – ah pawh thawnthu a la danglam lo a, qualifier – ah chak vekin chiang takin an tling. Team tha Portugal, Netherlands leh Denmark te nen group khatah awm mahse an hneh fai vek a, semi-final ah Italy lakah an vanduai hlauh.

Kum hnih hnu 2014 FIFA World Cup ah ropui takin an khel a, group stage ah 4-0 zetin Portugal an sawp. Quarter-finals ah team tha France hneh bawkin semi-final ah a thlengtu Brazil 7-1 zeta an sawp te kha theihnghilh a har hle. Final – ah Argentina hmachhawnin extra-time ah hnehna an chang a, hemi kum hian FIFA World Coach of the Year atan thlan a ni.

Euro 2016 ah tha taka bultanin quarter-finals ah kum 4 liam taa an hneh tawh loh Italy a hnehpui a, semi-final ah France lakah an vanduai hlauh. 2018 World Cup – ah pawh an che pui thei lo a, champion lai mah nise team tenau zawk a ngaih Mexico leh South Korea te hneh lo in group stage – ah puan thuah an tel.

Germany a enkawl chhungin game 197 a khelh pui a, vawi 124 chanpuiin za zelah 62.94 zet a chak pui a ni. Kum 15 zet a enkawl tawh Germany team chu Joachim Löw chuan a mangtha ta a, hnah hlui chu hnah tharin a thlak a hun ta.

Major tournament sulhnu :
Euro 2008: Final
World Cup 2010: Semifinal
Euro 2012: Semifinal
World Cup 2014: Winners
Euro 2016: Semifinal
FIFA Confederations Cup 2017 : WON
World Cup 2018: Group stage exit
Euro 2020: Last 16 exit