Champions League game 2 na khelh zawh a ni tawh a, result leh group standing chu post hran siam tawh a ni. Ni 27 leh 28-ah match 16 a awm a, inkhel hmuhnawm tak tak kan hmuh aṭanga ngaihdan siam theih hrang hrangte sawiho mai mai ang u hmiang. (He post hi mimal ngaihdan a nih avangin a dik famkim lo maithei a, comments lamah ngaihdan hrang hrang kan lo beisei ang.)

1. Bayern Munich player pawimawh ber Franck Ribery

Bayern Munich-a ‘star’ lian ber chu Arjen Robben a ni ṭhin a, mahse tun season zet chu French winger Ribery hi Bayern Munich mai ni lo, Europe-a winger langsâr ber a ni awm e.

Bayern Munich in Manchester City an hneh ṭumin player ṭha ber a ni a, vawiduai lo City tlarhnung a chhaih mangang a, Bayern attacking move kha Ribery awmna lam aṭanga chhuak deuh vek a ni. 2011-12 season-ah game 10 khel tawhin goal 3 a thun tawh a, assist 6 a nei bawk. A goal thun leh a ṭhiante a siamsak hian a pawimawhna chanve pawh a tilang zo lo hial ang.

Kum 3 vel chu inhliam leh mimal buaina neuh neuh vangin a khelh leh khelh loh a inzât nawk a, tunah chuan kum 2007/08 vela Ribery tak tak kha kan hmu leh ta. Tun dinhmunah chuan Europe-ah ani aia winger hlauhawm an awm lo a, Robben a rawn let leh tawh bawk nen, German club chhuanvawr hi Champions League-ah awlsam taka an tlâk mai a rinawm loh.

2. Real Madrid leh Barcelona bawk

Matchday 2 ah Real Madrid in mikhual Ajax 3-0 in an hneh a, khualmualah Barcelona in 5-0 ngawtin BATE an sawp. Ronaldo leh Messi ten an pet goal ve ve a, team pahnihte game a hmuhnawm ve ve a, champion tura rinkai ber pahnih an ni.

Ajax laka Ronaldo goal thun aia ‘counter attack’ ropui a tam lo ang a, Ozil, Kaka leh Benzema te ho in Ajax tlarhnung an ṭhiah dan kha hmuhnawm tham a ni. Tlarhma-ah mahni pawha game thlak thei ṭhiau an nei a, hmun tinah player ‘ṭha’ an inrem ṭhut mai. Anni ho remkhawm tur hian Jose Mourinho a awm a, knock out stage-ah team hlauhrawn ber pawl an ni ngei ang.

Europe-ah Real Madrid aia ṭha (?) chu Barcelona hi an ni deuh mai awm e. Kartâwpah Atletico Madrid an sawp tawh a, tunah goal 5 tho an thun leh tawh. Season tâwp hmain thil tamtak a la thleng thei a, mahse an thil danglam tak a thleng a nih loh chuan Xavi, Fabregas, Messi te ho hi an champion leh ngei a rinawm.

3. Manchester United mawng a pawp

Manchester United pet goal theihziain chanchinbu a luah hneh a, tlarhnungah pawh Jones, Smalling te ho an infaksiak a ni ber mai. Mahse Vidic tel lova khel United tlarhnung him lohzia Matchday 2 ah kan hmu e.

Old Trafford-ah, FC Basel lakah goal 3 an chhuah a, an chhuahbelh lo kha an vanneih vang a ni. Inhliam vang leh Basel hmatâwngte khelh ṭhat vang chu ni bawk mahse, 2011-12 season-a ManUtd tlarhnung hi a landan mai aiin a khawng tlat lo. Game 10 an khelh tawhah goal 11 an chhuah tawh a, game 3 ah chiah an goal an venghim tluan thei a ni. United fans ten Vidic an nghakhlel khawp ang le.

4. Hmalam panin Arsenal an kal zel

2011-12 season tîra Arsenal buaina kan hria a, tunah chuan an buainate an kalsan mek. An game hnuhnung 4 zinga 3 ah an chak a, Premier League leh Champions League-ah hma an sawn zel.

Arsenal hi an ṭha ta thut a ni lova, Olympiakos nen pawh an inbeitawk khawp mai. Olympiakos lamin an nawr thei viau a, Arsenal in game an thunun bik lo. Hei tak hi Arsenal fans te tan lawmna tur a ni!! An khelhṭhat vak loh ṭum leh game an thunun loh pawhin result ṭha tak an nei a, Arsenal in experience player an neih an ṭhatpui zel e.

Knockout stage-ah chuan Wilshere a dam hman tawh ang a, player tharte pawhin Arsenal game an man lehzual tawh ang. Kartâwpah White Hart Lane an luhchilh dawn a, an chak thei a nih ngat chuan Arsenal season a dik zaih tawh ang.

5. Fak tlak Napoli 

Champions League newcomer Napoli hi tun dinhmunah chuan Europe-a team ‘exciting’ ber an ni hial awm e. Group of Death-ah Bayern, Man City leh Villareal te nen an awmho a, game 2 ah point 4 hmu tawhin dinhmun ṭha takah an ding mek.

Tlarhmaa Cavani, Lavezzi leh Hamsik te ho hi chu kan hre vek tawh ang a, anni pathum chauh lo pawh player ṭha tak tak vek an ni. Tlarhnunga Campagnaro leh Cannavaro inkawp te, midfield-a Inler leh Gargano inkawpte hi Europe club liante el pha khawpa ṭha an ni.

Game 4 a la awm a, knockout stage an thleng thei a nih ngat chuan club lian hoin pumpelh hrâm an duh ngei ang le.