MANCHESTER UNITED FANS BUAINA KHA- PART 2

FANS THINRIM AN PUAK KEH

2006 a United-in Middlesbough an draw tum khan ‘Love United Hate Glazer’ tih an tar chhuak tan a. Hemite chhungkaw duh lohna hi a khat tawka aupui reng niin 2010 khan ‘anti-Glazer’ campaign an tih mai ‘green and gold campaign’ kan hmu tan. United fans tamtakin scarf a hring leh gold rawng intial an awrh ziah chhan pawh hei hi a ni. Nizanah pawh chhit-ên (flare) a hring leh gold rawng an tih en chuai chuai kha, kan hmu ang chu maw?

Club-in ba a ngah a, chumi phuhruk nan chuan season tin season ticket an ti sang ziah. Mahse hei erawh tunah chuan kum 10 chhung an ti sang tawh rih lo. Fans ten an lo beisei ve, Glazer chhungkua in Old Trafford siamthat nana sum thehchhuah an tiam ve te chu pa chhe kumtiam ang chauh a ni- thlen tik a nei lo. Hetihlai hian United hian sumdawnna huang an zauh nasa em em a, hetiang kawngah chuan an executive vice-chairman bang ta Ed Woodward kha mi chungchuang bik a ni a. Glazer chhungkua in Executive vice-chairman a an ruat chhan kha a chiang a ni.

Ram chhung leh khawvel ram hrang hrangah ‘financial partners’ an tih hi 53 lai an nei mek a, sum tam tak an hai luh phah ngei mai. Mahse heng hlawkna te hi Manchester United lungphum ber an team leh manager-te a thleng phak lo niin fans te hian an hmu a. ‘Result tha’ ai chuan ‘profit tha’ an um niin an ngai a, Glazer chhungkua an huatna leh an duh lohna a belhchhah ting mai. An club hmangaih leh tan em em chu sumdawnna leh sum siamna pakhat ve maiah an hmang niin an ngai a ni. An nu leh pa ni tura an beisei Glazer chhungkua kha, sumthun-i-nu an chang zo ta.

Hetiang anih chhoh lai tak hian Manchester United chuan European Super League (ESL) khelh tumin an hming an lo ziak ve hman a, fans thinrim a sosan phah kher mai. An hming ziahna kawlawm tui pawh a hul hmain an inhnuhdawh leh thu an puang a, mahse sum hmuh nan chauha an ngaih ESL a United hming lang kha anmahni tantute thinlung hliam blehchhahin a awm. Joel Glazer chuan fans te thawidam tumin an lakah ngaihdam dil sa-teh mahse a ngaihdam dilna hi an lo pawm awzawng lo! An lungawi lohna lantir turin fans-te chu kar liamta khan Carrington ground-ah(an training-na) banner nen an pungkhawm a. Tichuan he buaina inmung chho hi nizan khan puak kehin United tantu fans sang chuangte chu Old Trafford-ah hian an pung khawm leh ta a ni. A then ground-ah te lutin an zi huai huai a, trophy lo ruk tum tawk lah bo lo! Hetiang an nih tak avang hian chhimtîr âr chuk ang main Old Trafford tualah an chiau nuai nuai a ni ta ber- an demawm loh e.

-Zama RK