MSACS leh MFA tangkawpin a buatsaih thin, Red Ribbon Inter Village Football Tournament 2012 chu March 3, 2012 atanga Aizawla khelmual hrang hranga khelh tan tura tih a ni ta a; North East Games zawha khelh tura tih chu NE Games hun sawn hlat a nih vangin a hun hi sawn hlat ve hret a ni ta a ni.

Red Ribbon Football-a tel tum team-te chuan January 24 – February 18 chhungin MFA Office-ah Entry Fee Rs 200/- pek theih a ni dawn a, MFA lama Organising Committee chuan a hun chhung ngeia entry fee pe theuh turin team tinte a hriattir a ni.

Kumin Red Ribbon Football hi MFA chuan ‘football referee drive’ neihna hun remchangah a hmang nghal dawn a, Aizawl khawpui chhung team (Local Council team-te bik) tel tumte chuan football referee exam tur mi pakhat tal hming an pe lut tel tur a ni a, hei hi Mizorama football referee tha zawk leh thahnem zawk hai chhuahna remchangah hman tumna vang a ni.

Local Council team tinin an veng huam chhung atanga referee candidate tur hming an pek luhte hi Red Ribbon Football 2012 neih chhungin referee exam leh thil tul dangte tihpui an ni ang a, anni hi Red Ribbon Football 2012-a match official tur ni loin, tualchhung football-a referee thahnem zawk an awm belh zel theihna tura ruahman a ni. Referee tur candidate nei thei lo Local Council team (Aizawl khawpui chhung bik team) chu Red Ribbon Football 2012-ah an tel a rem chang lo vang.

MFA chuan inkhel kaihruaitu referee thahnem zawk a neih belh theihna tur leh, AIFF-in a beisei anga refereeing department-a hmasawnna thar neih tumin tan a la dawn a, chumi atana a hmalakna hmasaah chuan referee a tam thei ang ber chher chhuah phawt a, chumi hnuah referee awm sa leh referee thar awm belh turte atanga a beiseiawm deuhte national level referee thlenga chher chhoh zel a tum dawn a ni.

– Mizoram Football Association