Bolton chuan tun season-a an home-a an chak vawihnih nan Liverpool an lo hneh a. Inrinni zan khan 3-1 a Liverpool hnehin Bolton hian relegation zone an chhuahsan ve ta a ni.

He inkhelah hian Midfielder pahnih Mark Davies leh Nigel Reo-Coker te chuan goal an khung hnuah Craig Bellamy chuan Liverpool tan goal khat a khung a. Second half-ah Gretar Steinsson chuan goal a khung leh a ni.

Newcastle chuan Craven Cottage an tlawh a, hnehna an chang zo lova. Chelsea chak loh zarzovin 4-naah invawrhkaina hun an neih that nen, an hmang tangkai thei ta bik lo.

Beisei ang ngeiin he inkhelah hian Newcastle-in an khel tha hmasa a, first half chu Newcastle ta a ni ringawt mai. First half-ah hian Danny Guthrie-a long shot mawi lutuk hmangin Magpies hian hma an hruai a. Second half-ah Fulham-in an rawn nawr let a, inkhel hmuhnawm tak kan hmu.

Damien Duff-a penalty hlawh chhuah hmangin Danny Murphy chuan an si phurh a sut a. Hemi hnu hian Clint Dempsey chuan goal khat a khung a, Andrew Johnson-a penalty hlawh chu Bobby Zamora chuan a khung leh a. Hemi hnu hian Dempsey chuan goal hnih khungin hat-trick a siam a, Newcastle tan Hatem Ben Arfa chuan goal khat khung ve mahse Newcastle an tlawm chiang ta tho a ni.

QPR pawhin bottom three chhuahsan nan 3-1 in Wigan an hneh a, Wigan hian a hnuaihnung ber an chhuahsan thei lo zel thung.

QPR tan Heidar Helguson chuan penalty atangin goal hmahruai a khung a. He inkhela che tha em em Akos Buzsaky chuan free-kick atangin, mawi lutukin goal a khung a. Wigan tan Hugo Rodallega chuan free-kick atagin goal a khung ve leh a, mahse QPR tan Tommy Smith chuan long shot mawi lutuk hmangin goal a khung leh a, Mark Hughes-a hnuaiah hma an sawn dawn a ni maithei.

QPR an chak a, Wolves chuan 2-3 in Aston Villa an hneh loh bawk si avangin Wolves chu relegation zone-ah an tla thla ve leh ta a. Aston Villa tan loan-a an lakluh Robbie Keane chuan goal hnih a khung a. Mahse Wolves hi a football bul tanna an nih avangin a celebrate duh lo. Villa goal khat dang hi Darren Bent-a khung a ni a, Wolves tan Michael Kightly leh Dave Edwards ten goal an khung ve a ni. Wolves player Karl Henry chuan red card a hmu a, hmu lo ta se result a danglam maithei.

Everton leh Blackburn te chu 1-1 in an in draw a. He inkhela goal lutte hian sawisel a hlawh hle. Tim Cahill chuan hnai teah goal a khung a, he a goal khung nana ball lo khawih pertu Marouane Fellaini kha a hand-ball chiang hle a. Rovers tan Martin O’Neill-a goal khung pawh kha hand-ball a niin a lang bawk.

Hetih lai hian Marin O’Neill-a hnuaia siamtharna chang mek Sunderland chuan an mikhual Swansea chu 2-0 in an lo hneh a, O’Neill-a hnuaiah game 8 an khel a, game 5 an chakna a ni tawh. Sunderland tan Stephane Sessegnon leh Craig Gardner ten goal an khung.

West Brom pawh a zawna match 3 an chak loh hnuah Stoke an va tlawh a, 2-1 in an chak a. James Morrison leh Graham Dorrans ten goal an khung a, Stoke tan Cameron James ten goal an khung a ni.
——————–