Brazilian defender Alex chu French club Paris-Saint Germain player thar a ni ta. Alex hian Zirtawpni khan PSG a zawmfel a, hemi ni la la hian mipui hmaah phochhuah niin, PSG sporting director Leonardo nen chanchinbumite an hmachhawn bawk a ni.

Chelsea defender hlui Alex hian PSG-ah kum 2 leh a chanve chhung contract a ziak tih PSG official website-ah tarlan a ni a. A man hi pound maktaduai 4.2 a ni.

Kum 29 a upa Alex hian kum 2004 ah Santos aṭangin Chelsea a zawm a. Ricardo Carvalho leh John Terry te an awm tlat avangin kum 2007 thleng chu PSV Eindhoven-ah loan in a chhuak. Chelsea-ah hian regular takin first XI chang thei chiah lo mahse a khât tawkin a inlan ve reng a, player pawimawh tak a ni. Mahse tun season-ah Andre Villas Boas hnuaiah khelhna hun a chang thei ta meuh lova, a naupang zawk zawk tawh lo bawk nen, a khelh tam theihna zawngin PSG lamah a chhuak ta a ni.

Chelsea-a Alex lo kaihruai tawh ṭhintu, Chelsea manager hlui Carlo Ancelotti hi tunah PSG manager a ni mek a. A player thar chungchang hi sawiin, “Alex hi ka hrechiang a, mi ṭha tak, footballer ṭha tak a ni. England leh Netherlands ah a khel tawh a, Brazil national team tan a khel tawh bawk a. Champions League-ah vawi engemawzat a inlan tawh bawk a ni. Tharum a ngah a, professional ṭha tak a ni bawk. A khaikhawm nan chuan ka player duh chi tak a ni.” a ti.

Alex pawhin thuchhuah neiin, “PSG hi club ropui tak a ni a, chuvangin heta khelh hi ka châk em em a ni. Chelsea-ah khan Carlo Ancelloti hnuaiah kum 2 ka khel tawh bawk a. Thlahnih kalta chhung khan Chelsea chhuahsan theih ka duh em em a, PSG nen inbiak theihna remchang kan nei ta hlauh a ni. Engkim a kaltluang vek e.” tiin a sawi.

source: fifa.com