Rinkai leh rinkai lo

Zanin dar 9:30 hian Russia ram a St.Petersburg Stadium ah European Championship nomawi vawi thum chawi tawh Spain leh a vawikhat nan a Quarter-finals lut Switzerland te an inhmachhawn dawn.

Rinkai lo zawk Switzerland hi Italy, Wales leh Turkey te nen group khatah awmin pathumna an nih avanga round of 16 lut ve ‘tawk’ an ni a, mahse round of 16 – ah champion rinkai ber tih ngam, World Cup champion lai France barakhaih thei an ni. Les Blues lakah hian goal thum ngawt an thun thei a, Spain lakah an zam ngawt a rinawm loh.

Vladimir Petkovic hian kum 2014 atang khan Switzerland hi a enkawl tawh a, a naute hi a hrechiang tawk ang tih a rin theih. Euro 2016 leh 2018 World Cup khan round of 16 a lo luhpui tawh a, tunah a aia sang zawk a thlenpui ta a, mumang ram a leng mek Switzerland hian kal zel an duh ang. Swiss tan a pawi ber erawh an captain Granit Xhaka hrem vanga a khel thei lo tur hi a ni. Xhaka awm lo mahse France lak a goal hnih thun thei Haris Seferovic an nei a, player talent nei tha Breel Embolo bakah ‘awm lo ata awma siam thei’ Xherdan Shaqiri an kawl chhung chu an zam bik lo ang.

Spain hi Sweden, Poland leh Slovakia te nen group khatah awmin group stage – ah hian hneh loh nei lo mahse Sweden leh Poland lakah point thum an hmu zo lo. Chutih rualin an group match hnuhnung berah leh round of 16 – a Croatia an hneh tumin goal 5 ve ve an thun thei a, an harsatna lian ber ‘goal thun’ lamah an che tha chho viau.

Euro 1964, 2008 leh 2012 champion Spain hian position tinah an elpui tur te aiin player an nei tha zawk tih a chiang a, chutih rualin an manager Luis Enrique hian tlarhnung leh tlarhma lamah player thenkhat siksawi a chin avangin eng ang takin nge a naute a rawn rem dawn hriatthiam a har hle. Tlarhnungah Aymeric Laporte a khawng that a, midfield a khawih chet theih loh Sergio Busquests, Koke leh Pedri te an khelh ‘pangngai’ chuan tlar hma lam tan goal thun lamah harsatna a awm lo ang.

Ram pahnihte hi vawi 22 zet intum tawhin record – ah chuan Spain an chungnung hle a, amaherawhchu major tournament a an inhmachhawn hnuhnung ber 2010 World Cup group stage – ah khan Switzerland hi 1-0 in an chak !