Inrinni zânah Serie A match 2 a awm a, San Siro-a inkhel sawisel hlawh takah Napoli chuan 3-0 in Inter Milan an hneh a, Rome khawpuiah AS Roma in mikhual Atalanta 3-1 in an hneh bawk.

INTER MILAN 0 – 3 NAPOLI

Tunhnaia hmasawn nasa tak Napoli chuan San Siro-ah Inter Milan hnehin Serie A ah hmahruaitu an ni ta. He inkhelah hian Inter Milan midfielder Joel Obi chu yellow card pahnih a hmuh vangin hnawhchhuah a ni.

Red card sawisel hlawh

First half-a inkhel hmuhnawm takah team pahnihten chance an nei nual. First half tawp dawnah buaina tenau a chhuak a, Joel Obi chuan Napoli midfielder Maggio a tihtluk avangin penalty a châwi a, yellow card pahnihna a hmuh avangin hnawhchhuah a ni bawk. Replay-a a lan danin ‘foul’ hi penalty box pawna thleng ngei niin a lang a, penalty pekna tur a ni lo. Hei mai bakah Lavezzi a tihtluk vanga Obi yellow card pakhatna pawh kha sawisel theih tak a ni awm e.

Marek Hamsik chuan Napoli penalty hi a pêt a, Julio Cesar chuan lo dang mahse a per lêt leh chu defender Campagnaro chuan a pet goal. Campagnaro hi penalty pêt hmain box chhungah a tlanlut hman tih replay aṭangin a hmuh theih.

Inter Milan lamin referee thutlukna an duhlohzia an lantir avangin Cesar leh Zanetti ten yellow card an hmu a, manager Ranieri phei chu ‘red card’ pek a ni hial.

Second half ah Napoli goal hnih

Second half tir lamah ‘home team’ an hlauhawm zawk a, goal chance ṭha tak tak an nei nual. Mahse a tam zawk Napoli in goal an thun belh a, minute 56 ah Maggio chuan Napoli goal hnihna a thun a, minute 75 ah Marek Hamsik chuan a thunbelh bawk.

Napoli hian kum 1994 hnulamah Inter hi an la hneh ngai lova, tunah hian game 5 ah point 10 hmu tawhin Serie A hmahruaitu an ni mek. Inter Milan in point 4 hmuin 16 na an ni mek thung.

AS ROMA 3 -1 ATALANTA

Luis Enrique hnuaiah AS Roma an insiamṭha mek a, Inrinni zânah mikhual Atalanta 3-1 a hnehin, a zawnin Serie A ah vawi 2 an chak ta.

Roma hian first half-ah Bojan Krkic leh Pablo Osvaldo te goal hmangin 2-0 in hma an hruai a. Second half-ah Atalanta tân Denis chuan rawn thun ve mahse Simplicio chuan AS Roma tân a thun leh a, Roma hi 4 na-ah an inhlangkai tawh.

Nipui laiin Barcelona ‘game ang’ khelhpui a tum thu AS Roma coach Luis Enrique hian a sawi tawh a, an chetṭhat chhunzawm lem loh avangin ngaihsak a hlawh lem lo. Player a thlâk kual nasa a, ball an chang tam a, passing game mawi tak an khel. Tihtur tamtak la nei mahse an tum ram lam panin an kal hret hret tih a hmuhtheih.

Pathianni zân fixture