Manchester United chuan hmahruaitu Manchester City chu um zelin Swansea City chu Liberty Stadium ah an hneh thei hram e.

Javier Hernandez chuan minute 11 naah Swansea defender Rangel chetsual a zarah point thum an hmuhna tur goal a thun a ni.

Swansea chak tumin an rawn inrem tih a chiang khawp mai. 4-3-3 (off ball 4-5-1) an rawn hmang a, United lamin Carrick leh Giggs a laiah an rawn dah thung. Tan atanga min 10 ah Rangel chuan anmahni area bulah a pass sual a, chu chu Giggs chuan chak tak maia va umin ball a lak khalh a, goal-mouth ah Chicharito tan square ball pe pheiin awlsam takin ani in a lo thun a ni. Goal a luh hnuin a laiah an innawr dun zak zak a, a rei tual tual a Swansea an rawn pawng tual tual pawh a tihtheih awm e. An Winger ten United fullbacks te an chhaihbuai hneh hle a ni

Min 90 chhungin boruak a tang em em a, team pahnihten chance an insiam tha thei hle. Scott Sinclair in dinglam area pawn atanga an rawn “cut-back” a lo petthelh kha a uihawm thlawt a ni. Home a tlawm duhlo Swansea an rawn pawng tual tual a, Danny Graham a movement a United tan a hnawksak thei hle a ni.

United tlarhnung, Vidic leh Ferdinand ding dun an khawng tha a, Swansea in chance rawn nei thin mahse goal an chhuah duh mai mai biklo.

Rooney chance neih vawihnih a rawn hlauhawm hle a, tin, Nani huntawp dawn a a chance neih a uihawm hle bawk. Tin, hawn tawp dawn min 1 la awm a, tun inkhel a kan hmuh tam lemloh attacking move tha leh nalh tak mai United in rawn hmangin Jones chuan bar a rawn pet per bawk. United in thun belh tumin rawn bei ve leh viau mahse Chicharito goal khat hmangin point thum hlu tak an hmu ta a ni.

TEAM PERFORMANCE REVIEW:

SWANSEA CITY

LINE-UP: Vorm; Williams, Taylor, Monk, Rangel; Britton, Sinclair, Dyer, Routledge(Allen), Gower(Dobbie); Graham

GOALKEEPER: VORM a kheltha e. Hernandez a goal ah tihtheih a nei lo. A tihtur apiang hneh takin a ti zel a, a solid hle a ni. A distribution a tha hle bawk.

DEFENCE: WILLIAMS a kheltha hle. A lenna a hmang tangkai thiam a, tin, a positioning a tha em em bawk. Tin, zanina a teammate te ang bawkin possession a hmang tangkai hle. TAYLOR a khel tha e. Nani veng tura tih a ni a, attacking lam a pui theilo tihna a nia, mahse a tihtur erawh a hnehsawh hle. MONK a khel pangngai, goal an chhuahah khan a reaction a muang hrat tih a lang a, a bakah erawh a pangngai viau. RANGEL a kheltha lemlo. A chetsual zarah a team in an tawrh phah a ni.

MIDFIELD: BRITTON a kheltha hle. A passing a dik a, ball a koh peih em em bawk. Swansea 2nd half an rawn hlauhawmna chhan pakhat a ni. SINCLAIR veilam kilah a pace leh skill hmangin a hlauhawm hle a, mahse final ball erawh a awmlo deuh. A chance thelh a uihawm a, khatianga tihsual kha chu a hre reng ve ngei ang. DYER a kheltha thlawt a, Evra awm chhung zawng kha a chhaih buai hneh hle a ni. Fabio rawn luh hnuin harsa a ti deuh hlek zawk a ni. ROUTLEDGE a kheltha lemlo. United defence leh midfield inkarah space a hmu theilo a half-time ah thlak a ni. GOWER a khel pangngai viau a, ball a chanin a pass sual lo a, mahse creativity a awm lemlo. ALLEN rawn lut a rawn kheltha a, an mamawh creativity a rawn keng tel a ni. DOBBIE in Gower a rawn thlak a mahse inkhel ah a rawn langsar vak lemlo.

FORWARD: GRAHAM a khel pangngai e, a work-rate a tha in a tang em em a, mahse United defence in an veng hneh angreng hle a ni.

MANCHESTER UNITED

LINE-UP: De Gea; Evra(Fabio), Jones, Ferdinand, Vidic; Giggs(Fletcher), Park, Carrick, Nani; Rooney, Hernandez(Valencia)

GOALKEEPER: DAVID DE GEA a khel tha e. A solid a, a concentration a tha bawk. Half-time dawn a Scott Sinclair chance neih a lo dan kha a tha khawp mai.

DEFENCE: EVRA a khelchhia. Dyer khan a chhaihbuai hneh khawp mai. Yellow card a hmuh hnuin min 51 ah lakchhuah a ni. JONES a khel a inpawlh nuaih mai. A tackling a that viau bakah attacking a pui nasa a, mahse a awareness leh positioning duhthu a la samlo hle. Sinclair khan hei tak hi tum 2 vel a hmang tangkai anih kha. Hun tawp dawna bar a pet per erawh a uihawm hle. FERDINAND a khel tha thlawt. Hmanlai ang maiin a nghet churh mai a, Vidic in ball a chuh laiin ani in a lo cover tha hle a, a awareness leh positioning a tha bawk. United player kheltha ber a ni. VIDIC pawh a kheltha khawp mai. A huaisenzia a tilang a, a heading leh tackling thatzia kan hmu bawk. FABIO khan Evra a rawn thlak hnu khan Dyer chu a rawn veng hneh zawk.

MIDFIELD: GIGGS a kheltha hranlo. A assist ah goal lut a ni a, tin, ball a chhuhsak ve nual a, a bakah erawh a langsar lemlo. PARK pawh a khel chhia, a passing a dik hleithei lo a, tin, lehlam midfielder te pace lakah a buai thin. CARRICK a kheltha viau e. Langsar lemlo mahse midfield hnungdaltu ber a ni a, a passing a dik in Swansea ho ball inpe kual tur a lo tibuai hneh hle a ni. NANI a kheltha lemlo. Hun tawp dawn a chance a neih bak a langsar lemlo a, an veng hneh angreng hle a ni. FLETCHER lo lut kha chuan result hum tumin midfield a rawn luah nghet a, a langsar em em lo. VALENCIA khan right-midfield ah Hernandez a rawn thlak hnuin hmun a luah a, ani pawh langsar vak lemlo mahse a movement chu midang aiin a zia deuh hlek zawk.

ATTACK: ROONEY a khel pangngai a, a ngaite bawkin attack leh midfield inkarah a tal tam a, ball a la theiin a ball pek a fing thei hle. 2nd half ah a tlanlet tam zual a, goal chance erawh a nei tam lemlo. HERNANDEZ goal thun turin a titha a, a harh bawk. Mahse ani pawh ball a chanin a talbuai trep thin a, chuan a first touch a tha lemlo bawk.