A hmasain ZoFooty.com ngaihlu a lo tlawh thin zawng zawngte chungah lawmthu kan sawi a ni.

Kan hriat theuh angin ZoFooty.com chuan thla engemawzat hmel a hmu ve ta a. Post hmasa ber, February ni 8 atanga vawiin thleng hian tlawhtu pawh kan ngah ve viau hman a ni. Page views phei chu 20,000 chuang a kai a, hei hian min ti phurin hei aia website tha zawk leh changtlung zawk neih min ti chak em em a ni.

Duhthusam
Tuna kan website hi tha kan tih rualin duhthu a sam lo em em a. Kan duh dan (leh he website tlawhtute duh dan pawh anih kan ring a) chuan ZoFooty.com-a in sign up tawh phawt chuan football chanchin engpawh post thei se, hei hian ZoFooty.com hi Mizo football community website diktakah a hlangkai dawn a ni. Amaherawhchu tuna kan website hmanlaiah hian hengte hi kan la ti thei rih lo a ni.

Tin, Zoram football khawvel hmasawn zelah hian ZoFooty.com chuan kawng tam takah kan pui ve theiin kan hria a. Chungte chu kan football association leh club neihte chawi lar leh Mizo football players te khawvel zau zawk hriata pho chhuah te a ni. Hei bakah hian Aizawl khelmual hrang hrangte hawh dan leh Sports dawr thenkhatte tarlanna hi tun aia changtlung zawka buatsaih kan duh a ni.

A tak ramah…
A chunga kan sawi tak zawng zawng avang hian kan website hi design that a, upgrade kan tum a. Tunah hian hma lak mek a niin, web design-tu tur te pawh thlan fel an ni tawh a ni. Kan tum anga thil a kal chuan website design thar hi July thla tir atanga hman tan tum a ni.

Tun ami nena a danglamna tur te:
1. A banner, colour leh design hrim hrim hi a danglam dawn a ni (eng ang chiahin nge a danglam ang tih kha chu nidanga sawi chian turin dah ta ila).
2. Posting chungchangah hian a chunga kan sawi tak ang khan ZoFooty.com-a in sign up te chuan football kaihhnawih tawh phawt chu a submit theih dawn a ni.
3. Mizoram football association hrang hrangte leh club hrang hrangte tarlan a ni dawn a ni.
4. Tun aia changtlung zawkin Aizawl khelmual hrang hrangte thlalak leh heng khelmual enkawltute contact address leh phone number-te dah a ni ang.
5. Sports dawr hrang hrang tun aia tam zawk dah belh tum a ni.
6. ZoFooty-a post dan tur kan hriat theuh theih nan a step-by-step guide buatsaih mek a ni a. ZoFooty members – ‘ZoFooties’ tan a tangkai khawp ang!
7. Advertisement space dah tum a ni bawk.
8. Admin te chanchin tawi leh thlalak bakah ZoFooty.com lo chhuah dan tawi te a awm bawk ang.
9. Awlsam zawka ZoFooty.com biak theih nan contact form dah bawk a ni ang.

ZoFooties te’n min puih theihna:
Admin te hi tunah hian mi pakua (9) kan awm a. Mahni hna theuhva buai tak takte kan nih hlawm avangin football chanchin hi duhthusamin kan rawn ziak thei lova. Hetah tak hian kan website thar hian hmasawnna pawimawh tak a rawn keng tel dawn a; chu chu member tin te’n an post thei dawn a ni. Mahse, website thar kan hman hma chu tun ang hian kan la kal rih a ngai ang.

Tuna ZoFooties te’n min tanpui kan mamawh em emna chu feedback lamah hian a ni. A chungah kan sawi bakah khian sawisel tur emaw, ‘heti hian ni zawk se a tha lo maw’ tihte kan nei anih chuan khawngaihin comment-naah hian sawi hreh lo ila. ZoFooty.com hlawhtlin leh hlawhtlin loh chu a admin te ai mahin he website tlawh thintute leh ngaihlutute chungah a in nghat a ni. Chuvangin ZoFooties zawng zawng, in tanpuina leh puihna kan ngen a ni.