Mizo professional footballer te zinga tawnhriat nei tha leh sulhnu ngah ber te zinga mi Zohmingliana Ralte chuan nimin khan Instagram kaltlangin professional football a chawlhsan thu a puang.
Zotea hian a vanglaiin I-League leh ISL club hrang hrang tan a khel a, chung zingah chuan Shillong Lajong, Pune FC, DSK Shivajians, Aizawl FC, Northeast United, Bengaluru FC leh Chennaiyin FC te a tel. A chawlh tur thu a puang hi a uitu a ngah hle a, a team lo khelh tawhna te bakah a professional footballer pui engemaw zatin an ui thu an social media kaltlangin an puang a ni.
Zotea hian Pune FC tana a khelh laiin kum 2014 AFC Cup – ah khan Hong Kong champion Kitchee SC lakah goal hnih thunin Pune hi a vawi khat nan AFC Cup – ah a chak pui a, Indian zinga AFC Cup – a goal hnih thun thei hmasa pawl a ni.Aizawl FC in 2016/17 I-League nomawi an chawi theih nan player pawimawh ni bawkin Mohun Bagan laka a goal thun kha Indian football chanchinah nuai bo theih a ni tawh lo.
