NOTTINGHAM FOREST PENALTY KHA ! – Lawmkima Hmar

Nizan FA Cup 3rd Round-a Nottingham Forest tana minute 85-naa Dowell-a goal thun tum khan Arsenal player lungawi lo chuan referee panin an sawisel tih inkhel en chuan kan hmu hlawm awm e.

Hun tawp hnaia Debuchy penalty chawi hi Kieran O’Neill Dowell chuan petin a pet hma lawkin a tawlhthlu a, a ke dinglamin ball khawih hmasain(?) a ke veilamin a pet goal zui ta niin a lang.

Engvang nge ? : Football danah penalty hi hma zawng chauha pet phal niin hma zawnga ball a kal chiah hian ball chu a nung a, midangin ball an deh ve hma chuan penalty pettuin ball a khawih nawn thiang tawh lo (The Laws of the Game, Chapter 14).

Hei hi dan dinglai a nih avangin penalty pettuin ball a deh nawn chiah khan a foul avangin Arsenal player te khan goal-a pawm chi niin an ngai lo va, referee Jon Moss chuan linesman a rawn hnuah goal-a pawmzui a ni.

Referee khan goal-ah a puang bawk si!! : Referee te hi mual chhungah thuneihna pumhlum(full authority) pek an ni a, chutih rualin an thu tlukna siam tawh chu ball a nun leh hnu/inkhel tanthat leh hnuah chuan anmahni ngei pawhin an sut leh thei tawh lo!

Referee te hian an thil hmuhchian loh leh hriatchian lohvah chuan, The Laws of the Game, Chapter 5-a tarlan a nih angin Assistant Referee (Linesman) te thurawn angin thu tlukna a siam thin a, nizan pawh khan linesman in a rawn angin penalty kha goal-ah a pawm.

Referee in a tisual em ? : Tisual lo. A thu tlukna erawh a dik lo mai thei!! Jon Moss khan kha thilthleng kha a hmuhchian miau loh avangin Asstistant Referee a rawn a, inkhel enkawl kawnga a thawhpui thurawn angin thu tlukna a siam a, a tidik.

Inkhel enkawl chungchangah ‘referee te hian zaah za (100%) in an tidik thei ngei ngei tur a ni’ tih a awm lo va; 100% in an tidik thei lo pawh ti ila kan uar lo vang. Chuvang chuan referee thutlukna (Decisions of the Referee) chungchangah chuan ‘Dik ber nia a hriat’ chu thu tawp a ni tawp. Second reilo te chhungin thu tlukna lian tak an siam a ngai a, hna hautak a ni.

Chuvangin nizan khan Referee khan Assistant Referee puihnain dik ber nia a hriat angin thutlukna a siam a, a thu tlukna kha dik lo palh pawh nise dik ber nia a hriat anga thu tlukna a siam avangin a tidik!!