THE NORTH LONDON DERBY: LONDON HMAR LAM INDONA CHU – Ema Ralte

English football-ah hian club inhal tak tak, khaw khata club pahnih awm inel leh iner tak tak mai an awm thluah a. Heng clubte inkhel boruak chu kan ram atang pawhin a huhâng nat zia kan hre phak hial a nih hi!

Heng English club inhal leh inel tak takte zinga boruak nei lian ber pawl, London hmar club pahnih inkhel – North London Derby chu naktuk zanah hian khelh a ni dawn a, Tottenham Hotspurs in Arsenal an lo mikhual dawn a ni.

A bul rêt atangin han tan ta ila…


Tottenham Hotspurs hi London hmar lama club hlun niin kum 1882 khan din a ni a, Spurs din a nih hnu kum 4-naah (1886) Arsenal hi din a ni chauh a ni. Hei hi Spurs tantu tam takte an inchhuanna niin London hmar lam chu an ta tlukin an ngai a, a chhan chu Arsenal hi kum 1886 a din ni mahse a tir lamah chuan London chhim lama awm an nih avangin Tottenham tantute chuan ‘pêm’ angin an sawi fo thin.

Kum 1913 khan Arsenal chuan London hmar lamah, Tottenham khelmual atanga hla vak lovah khelmual (stadium) thar an sa, chutah chuan hemi kum (1913) hian an insawn a, chu an khelmual thar chu Highbury a ni. Hemi kum atang hian kum 31 chhung zet mai London hmar clubte zinga ropuibera in ngai Spurs chuan elpui tur club an nei thar a, North London chu a var leh a sen indo hmun anga ngaih theih a lo ni ta! (London hmar lamah hian football club 20 chuang an awm)

Chutichuan engtin zel…


Hetia Arsenal in London hmar a bu an khuar hnu hian Tottenham Hotspurs chuan North London roreltu an nihna chu an hloh chho tan a ni chho nghal deuh mai a. Indopui pakhatna a rawn thleng a, kum 5 bawr vel zet football chu a khelh hleihtheih loh a. Hemi hnu-ah hian Arsenal chuan English First Division League chu tum 6 zet an chawi a, a hnuah Tottenham chuan kum 1950-51 leh 1960-61 ah te League nomawi hi chawi ve lehin hemi hnu hian Arsenal chuan league nomawi vawi 7 an chawi leh a, Spurs erawhin an chawi leh ta lo a ni.

Hetiang a nih chhoh hnu hian London hmar lam chu Arsenal in an awp chho niin a lang a, mahse Tottenham nena an inkar boruak erawh a lian chho tulh tulh a. Boruak tang tak leh inel tak karah Premier League hun a thleng chho a, kum 2001 ah Tottenham defender tha Sol Campbell chuan Spurs-a a contract pawtsei duh lovin free transfer in Spurs hmelma kumhlun Arsenal a han zawm a, ‘Arsenal-ah hian nomawi chawi turin ka rawn lut a ni’ a han ti phei chu Gunners leh Spurs tantute inkarah pawh nasa takin boruak a sang chho a nih kha.

Kum 2003-04 season a lo thleng a, Arsenal chuan Tottenham Hotspurs khelmual – White Hart Lane ah ngei mai league champion an nih an han lawm chu Gunners tantute an sapatal a, Spurs tantute erawh an mittui tlak dan a dang ta thung.

Arsenal tana goal khung tam ber Thierry Henry chuan Arsenal-a a khelh chhung zawnga a chhuanber te zinga mi ni a a sawi chu Tottenham Hotspurs laka an tlawm lo kha a ni a, hei hian he London hmar lama club pahnihte inkar boruak chu a hril thui viau âwm e.

An inhnaih chho tan…


Kum 2015-16 season a ni a, season tluana league inkhel hnuhnungber khelh ni a thleng a. Hemi ni hian Spurs chuan Arsenal lakah point 2 in hma an hruai a, an game hnuhnungber ah point an hmuh hrim hrim chuan Arsenal chunga awmin season an khar thei dawn a ni.

He league kharna inkhel-ah hian Arsenal chuan Aston Villa an mikhual a, Spurs chu Newcastle United khelmualah phur tak leh beiseina sang tak nen an kal ve bawk a. Stadium pahniha inkhel en ten radio ngaithla pahin inkhel an en a, Arsenal in Aston Villa laka goal an khung chu St. James’ Park lamah pawh an lo hre vek zel a.

Emirates Stadium-a inkhel entute Arsenal in an pet goal ah ni lo an au an au ta mai a, Newcastle United in Tottenham Hotspurs lakah goal an lo thun tlauh tlauh chu niin. Hemi ni hian Arsenal chuan Aston Villa chu si 4 faia hnehin Spurs erawh Magpies lakah 5-1 in an tlawm a, Arsenal chunga season khar an in beisena zawng zawng chu nikhat chhung lekin a thamral ta a, Arsenal tantuten an tih thin angin Tottenham chunga awma league an khar an lawmna thin ‘St. Totteringhams’ Day’ chu an hmang chhunzawm leh thei ta a ni.

London hmar roreltu an inthlak chho em ni…?


Kum 2016-17 season a zo a, Tottenham Hotspurs chu Arsenal chungah an awm ta vâng mai! Hei hi kum 22 hnu a Spurs in league a Arsenal aia sanga season an khar vawikhatna a ni.

Mauricio Pochettino hnuai-ah Tottenham chuan nasa takin hma an sawn a, 2016-17 ah phei hi chuan an hmelma club Arsenal aiin point 11 zet maiin an sang a, league-ah 2-na niin Arsenal hian kum 20 hnua a vawikhat nan Champions League an khel pha lo a, Spurs tantute an nui a, Gunners tantute thinurna a nasa hle thung.

Hemi boruak atang hian mi tam tak chuan North London ah lalna inthlakthleng (power shift) a thleng chho dawn tiin Spurs chu London hmar a roreltu thar ni turin an sawi a, English football a commentator leh pundit hrang hrangte pawhin Spurs hian Gunners hi an hliahkhuh chho tan niin an ngai bawk.

Tunah eng nge an dinhmun le…


Tun season (2017-18) ah hian North London Derby hi vawikhat kan hmu tawh a, Emirates Stadium-ah Arsenal chuan si 2 faiin Tottenham hi an lo hneh a, chuta Arsenal tantute sawi ber chu ‘London hmar hi chu a la sen reng a ni’ tih te, ‘London hmar ah rorelna a inthlak dawn lo a, Arsenal in ro an la rel reng dawn’ tihte a ni.

Mahse season inkhel a awm chho mup mup a, Arsenal hian khual mualah chak hmel an hmu hlei thei lo a, chumi avang chuan an hmelma kumhlun Spurs chu season liamta ang bawkin an chungah an thu leh ta vung mai a. Tuna an inthlauhna hi point 4 niin Tottenham hi league table-ah 4-na an ni a, Arsenal hi 5-na an ni.

Wembley-ah an inkhel dawn…


Tottenham Hotspurs hian an khelmual White Hart Lane chu an sak that mek avangin England National Stadium – Wembley Stadium chu tunah hian ‘home’ angin an hmang a, he khelmual zau tak maiah hian a tirah che tha lutuk lo mahse tunhnaiah an record a tha hle mai a. Wembley-a an lo tuk dawl zingah UEFA Champions League nomawi chawitu Real Madrid bakah Borussia Dortmund te, Liverpool te leh Manchester United te an tel a ni.

Spurs hian tun season-ah Wembley Stadium-ah league game 13 an khel tawh a, tun season-a an mikhual hmasaber Chelsea an hneh loh hnu khan he stadium-ah hian hneh loh la tawng lovin Wembley-ah game 12 zet mai hneh loh tawng lovin tunah hian an kaltuang mek a ni.

Mauricio Pochettino nauten Wembley an hmangthiam ang tho hian Arsene Wenger-a naute hian Wembley hi an ta neih ve a. Hei hi a chhan chu he stadium-a an khelh hnuhnung game 9 ah hnehna an chang vek a, hemi avang hian Arsenal tantu – Goonerte pawhin ‘Wembley hi kan second home a ni’ tiin an sawi thin.

Premier League tan a nih hnu-ah tun tum hi Wembley a Tottenham Hotspurs leh Arsenal intum hmasakberna tur a ni a. Hemi hma hian cup competition-ah tum 4 an lo in hmachhawn tawh a, Arsenal hian vawi 2 hnehna changin vawi 1 an in draw a, Spurs hi vawi 1 an chak a ni.

London hmar a a vâr lam hian Premier League top scorer ni mek Harry Kane an nei a, hei hi tun dinhmunah chuan thlamuanpui tham a tling a. Ani bakah hian inhliam, an defender Toby Alderweireld chu a hliam te a dam tawh a, North London Derby a a khelh theih tur thu pawh amah hian nimin lamah a lo sawi tawh nghe nghe.

Hetiang deuh chiah hian ‘London hmar lam chu a sen’ ti lam Arsenal pawh an game hnuhnungber a Everton an sawp avangin an phur hle a, an phurna tizual turin striker thar Pierre-Emerick Aubameyang bakah Henrikh Mkhitaryan an nei thar a, Mesut Özil chuan contract thar a lo ziak bawk nen Arsenal tantuten record an neihthatna hmun Wembley a an hmelma club Spurs va luhchilh chu an châk zek zek tawh bawk a ni.

Naktuk zan dar 6:00 ah Wembley Stadium-ah London hmar club pahnihte an in hmachhawn dawn a, Spurs hian London hmar-ah roreltu thar an nih zia an pholang dawn nge Gunners hian an laipui chu Wembley a tipuakin London hmar lam roreltu an nihzia an lantir dawn… Hun tlemte chauhin min dang ta!

Tottenham Hotspurs vs Arsenal overall record –
In hmachhawn tawh zat – 194
Tottenham hnehna chan zat – 62
In draw zat – 51
Arsenal hnehna chan zat – 81

Posted in Analysis, Arsenal FC, Articles, Rampawn.

Leave a Reply

Or