BUNDESLIGA MANAGER NAUPANG BER CHU – Lawmkima Hmar

TSG 1899 Hoffenheim chu: Kum 1899, July 1 daiha din tawh German club hian 2008-09 season khan a vawi khat na’n Hoffenheim chuan German top division league German Bundesliga an khel a, kai thar e ti lovin an che tha hle! An player midfielder Sejad Salihović leh a hmatawnga awm Vedad Ibišević, Demba Ba leh Chinedu Obasi ten par an chhuang a, Ibisevic phei chuan a game hmasa 17 atangin goal 18 lawih a thun. League-ah hma hruaiin game 17 khelh hnuah pawh leader an ni fan a, an game tho thang tak, a tam thei ang ber goal thun tumna chuan mi mit a la-in tan an hlawh a, game 17 atangin goal 42 an thun theih avangin an season khatnaah an champion nghal dawn niin an ngai hman.

Mahse, an vanduai ta. An hmatawng neih hriam ber Ibisevic chuan thlasik chawlh an hman laiin a khupah hliam na tak neiin league khelh hmabak zawng a khel thei ta lo va, club in tuarin a zawnin match 12 chhung chak an nei ta lo. Champion tura beisei chu 7-naah an awm ta dawng mai!

A kum lehah player insiksawi mah se 11-naah an tawp a, an kai tirh an phak thei tawh lo. 2012-13 season phei kha chuan league table a 16-na ni chungin season an khar a, relegation play-off khelin an inham tang hram hram. A dawt leh chiah season-ah ‘tawng pawng nawr’ tactic hmangin season an tluan a, goal 72 thunin goal 70 an chhuah. Kum 2011 leh 2016 inkarah manager 8 an nei hman!

Manager naupang chu : Season liam ta khan hmasawn tumin an bei ngial tak na a, eng ruai an ang lo hle. Kum 2016 kum tirah chuan German club hmasawn chak berte zing a mi, Gustovo, Demba Ba, Ibisevic leh Firmino te siam liantu hian division hniama tlak an hnaih!

An manager Markus Gisdol chu kum 2015 October thla khan ban a ni a, a aiah Huub Stevens lakluh a ni. Mahse, Stevens hian a hrisel loh chhuanlamin lawng pil mek ata zuan chhuah thlangin February 2016-ah banna a thehlut. An mangang chuan U19 coach atana an rawih mek Julian Nagelsmann chu manager thar atan an la tawp!
Hetih lai hian Hoffenheim chu league table mawng ber dawtah awm mekin hmun him china awm hnaivai ber an phak lohna chu point 7 daih a ni. Chutiang dinhmun atanga chhanchhuak tura tawnhriat nei tlem kum 28 mi lek beisei chu a atthlak ve ta viau ang.

German Bundesliga chanchina manager naupang ber rawn ni ta chu manager lailawk atana ruai satliah mai lovin kum 3 daih contract an ziahpui leh ta nghal a, ‘Hoffenheim Board chu an va mawl em’ tih mai a awl khawp ang. Game 14 chiah awm tawha point 5 laia a him chin hnuai lama an la awm laia an thu tlukna hi a mak ve bawk em atin ni!

Engtin nge a tih bik? : Senior team a’n enkawl chu ngaihtuah tur a tam viau, player thenkhat chu amah aia upa an nih avangin an zah loh ang tih hlauhthawnna a lian a, a player ten phurna an tlakchham avangin a tihphur thiam hle a ngai bawk ang.

Mahse, a naupanna ngaihnep chi awzawng a lo ni lo. Joba ziaka ‘Kum tam an fing chuang lova, upaten thil an hrethiam chuang lo” tih chu a takin a thlentir! Uluk takin a player te khelhthat loh chhan a chhui a, an mu tan ber a hriat chhuah hnuah a chinfel dan tur pawh a duang chhuak nghal.

Tichuan player ten kalphung pangngai ‘routine’ neia kal bek bek chu an nin ber a ni tih hriain tihdan thar a ching chhuak a, a ninawm loh dan tur a dap. First XI nghet nei duh lovin an training dan leh training hunbi thlengin a thlak kual a, zinga training reng lovin a chang leh tlaiah a training pui daih a, thil ngai a zir pui reng duh lo bawk. An khelh dan phung ‘tawngpawng nawr’ pawh a thlak kual zeuh zeuh a, goal venhim an thupui ber chang a tam ta mai!

Player inla pawimawh tak, bul tan tur chiang saa inngai thinte pawh bench-ah dahin, bench a awm thin ten first an rawn chang a, thil danglam rawn awm ta chuan a ti phur tlang ta hle.

Thu tlukna siam suala ngaih Hoffenheim Board hian an club tana mi tha chu an lo hre khawp mai chu lo niin; an lakluh lai February 2016 a table mawng ber dawta awm chu point 42 hmuh theihna atanga point 23 hmuhpuiin a chhanhim ta tlat mai!

Season thar an chuangkai a an tha telh telh. “Bench a awm thin player te hi thlauhthlak tur an ni lo, fisrt XI chang thinte nen angkhat renga en tur a ni” tiin bench a an dah tawl mai mai thin Adam Szalai chu an hmatawng Andrej Kramaric, Mark Uth, Marco Terrazzino leh Sandro Wagner te karah hun remchang a pe a, a tisual lo hle Hungarian forward hi goal pawimawh thuntu a ni thin. Tlak loh tum thin kha Bundesliga-ah 3-na a nihpui ta reng mai.

Amah hrim hrim hi in la ‘VIP’ lo ve tak niin a hranpain office pawh a nei lo va, a assistant nen an intawm! A chang chuan pen leh note bu chauh inchhawpin room-ah insawr bingin an khelh dan tur a ruahman thin. Tunlai thiamna leh changkanna hmang tangkaiin an tumpui tur player te statistics leh data lakhawmin a zirchiang nasa thei hle.

Tin, khelh dan ngai rengin a khelhpui ngai lova, 4-4-2, 4-3-3, 4-5-1 formation te hmanthlak fo mahse, April 4, 2107 a Bayern Munich an hneh tum kha chuan 3-4-3 formation rawn hmangin high pressing game a khelhpui leh daih! Si khat faia hnehna changin hei hi Hoffenheim in Bayern Munich an hneh hmasak ber tum a ni nghe nghe.

Julian chu tunge? : German chanchinbu ten Hoffenheim manager hi tunge a nih an hre bik lo va, an chanchinchu headline-ah ‘Julian chu tunge?’ tih an hmang nual. An demawm loh ve. Tunge a lo nih reng reng le?

A chanchin kan sawi mek Julian Nagelsmann hi July 23, 1987 khan Landsberg am Lech, West Germany-ah a piang a, centre –back feet 6 leh inches 3 a sang hian youth level-ah 1860 Munich leh Augsburg tan a lo khel tawh thin. Amaherawhchu, vanduaithlak takin a khup na takin a hliam a, senior team tana inlan hman lovin U19 level-ah a tawp. Beidawnnain a tlakbuak nasa ve hle, “Kum naupang te ni chunga inkhelh ka chawlhsan a ngai ta mai khan min ti lungngai tak zet a ni,” a ti.

A tum ber a nih theih tak lovah chuan zirna chhunzawmin Business Administration semesters 4 a beih hnuah Sports Science a zir chhunzwm daih! Hemi hnu hian coaching lam luhchilhin Augsburg-ah tuna Borussia Dortmund manager ni mek Thomas Tuchel hnuaiah a inzir. Tutchel hian 2007/08 season khan an tumpui turte zirchiangtuah a ruat thin a, hei hian a hnu zelah hmelmate chakna leh chakloh hriatna kawngah a pui hle.

Manager Markus Babbel chuan December 2012 khan Hoffenheim chhuahsanin a aiawhtu atan Frank Kramer lak a ni a, ani hian Augsburg-a awm mek Nagelsmann chu assistant coach atan a la lut. Hetih lai hian kum 25 mi lek niin Bundesliga assistant coach naupang ber record a ni. Marco Kurz leh Markus Gisdol te hnuaiah pawh a hna hi chhunzawm zelin an club hian 2012/13 season khan chhiatpui an tawk a, play-off khelh ngaia awmin buaina neuh neuh an ngah zui hle. Heta tang hian football huang chhunga harsatna hrang hrang awm thinte a hriatthiam phah.

Under-19 team enkawlin a season khatnaah a champion pui nghal a, 2014/15 khan 2-na a nihpui leh thei. Villarreal khelh dan hi a duh chi tak niin an manager ten naupang te te an chhawr thin avangin a tan hle a, Barcelona leh Arsenal game a en nasa thin hle bawk. ‘Mahni goal hnaiha ball awm ai chuan lehlam goal hnaiha ball a awmin goal thun a hnai zawk’ tiin a nawr lam a thupui a, manager a nih hnuah hian 2008-09 season a Ralf Rangnick hnuaia game rang leh tho tang et awt ‘high-pressing style of football’ an tih chu a rawn chawinung leh.

Hoffenheim-in February 2016-a manager atana an lak hlim hian Bundesliga head coach ni turin senior coaching license a la nei lo va, March 2016-ah exam a hmachhawn dawn ek ek chauh! Mahse, a sulhnu te an enin German Football Association (DFL & DFB) te lung a dum a, phalna an pe lailawk. Sports Science-a Bachelor degree nei hian thluak tha tak a nei tih langin club puitling enkawl chunga exam in a ruala A-licence coaching exam zingah mark a hmu sang ber!

Nagelsmann hi kumin July 23, kum 30 a tlin ni; a pianchamah tak German Manager of the Year atan thlan a ni a, he chawimawina dawng tawhte zinga naupang ber a ni nghe nghe.

Budget hniam tak leh player langsar pawh nei lovin season liam ta Bundesliga ah khan vawi 4 chiah a team te tlawmpui a, table ah 4-na hauhin Champions League play-off an khel dawn a, zanin (August 15, 2017) hian Liverpool hmachhawnin an tlang zui a nih chuan an club chanchina a tumkhat na’n Champions League-ah kan hmu ang!