CHENNAIYIN FC – AH J&J AN NGHET

Indian Super League club Chennaiyin FC – ah Mizo tlangval Jeje Lalpekhlua leh Jerry Lalrinzuala te an cham chhunzawm dawn.

English coach John Gregory enkawlna hnuaia khel tur Chennaiyin FC ah Jeje hi ISL din tirh atangin a la khel ngar ngar a, 2015 – a an champion theih nan goal 8 thunin a thawh hlawk hle. Hnahthial tlangval hi ISL a Indian player zinga goal thun tam ber ni mekin goal 13 a thun tawh a, Chennaiyin FC tan a goal thun tam ber dawttu a ni bawk.

Kum 2015 a ISL Emerging Player of the Year a thlan Jeje hian kum thum daih contract a ziak a, Zofooty.com in thu a dawn danin Hnahthial tlangval hian season khatah cheng nuai 140-150 vel a hlawh dawn a, kum thumah chuan a tlem berah cheng nuai 420 a hlawh dawn tihna a ni ang. Indian Super League 2017 – ah player lilam (draft) an la nih loh avangin player dangin engzat chiah nge an hlawh dawn hriat la ni lo mahse ISL din hnuah Indian player zingah Jeje aia hlawh hnem hi an la awm lo niin a lang.

Bethlehem Veng tlangval Jerry Lalrinzuala hian nikum khan Chennaiyin FC hi zawmin beisei phak bakin a khel tha a, Marco Materazzi enkawlna hnuaiah a par vul. Dead-ball specialist Jerry hi ISL Emerging Player of the Season atan nikum khan thlan a ni tawh a, tunah hian India U-23 tan Singapore-ah a feh chhuak mek.

Mizo tlangval pahnih rualin Chennaiyin FC hian goalkeeper tawnhriat ngah Karanjit Singh leh rawlthar duhawm Anirudh Thapa an lalut bawk.