Mohun Bagan captain hlui Manitombi Singh a thi

India international defender leh Mohun Bagan captain hlui ni bawk Manitombi Singh chu kum 39 mi niin vawiin khan a thi a, a nupui leh a fapa kum 8 mi a kalsan.

Kum 1981 a piang Manitombi hian Army Boys – ah a football zinkawng zawh tanin Services tan kum hnih a khelh leh hnuah Air India, Salgaocar leh Mohun Bagan – ah hming a chher zui a. Mariners tan hian kum 2003 – 2005 chhung khelin nomawi engemawzat a chawipui a, a hnampui Tomba Singh leh Renedy Singh te nen an khelho hman a ni.

Kum 2012 atang khan Manipur State League khelin NEROCA a zawm a, 2014 khan an state league – ah a champion pui nghe nghe. Hemi hnu hian an Manipur club tha Anouba Imagi Mangal (AIM) zawmin inkhelh a chawlhsan hnuah he club – ah hian head coach a ni zui a ni.

Manitombi hian ram tan pawh hming a chher hman hle a, 2002 Busan Asian Games – ah khan India team – ah a tel a, Stephen Constantine – a hnuaia 2002 LG Cup champion team hmingthang takah khan a tel bawk.

AIFF leh Mohun Bagan chuan thuchhuah siamin Manitombi an ui thu hi an tarlang a ni.