Tunge Aizawl FC coach thar ni dawn ?

I-League champion lai Aizawl FC in foreign coach pahnih Manuel Retamero leh Paulo Meneses te an chhawr tawh a, an hlawhtlinpui lo ve ve.

Manuel kha a game a hmuhnawm a, ban a nih khan Aizawl FC hotute an dawhthei lo lutuk a ni tiin fans tam takin sawisel mahse Khalid Jamil-a hnuaiah Aizawl FC in I-League nomawi an chawi avangin AFC fans te zingah Manuel-a hming lam ri an tlem tawh.

Khalid-a chhuah hnuah Portuguese coach Meneses lakluh a ni a, phat rual lohin season hmasa aiin player a nei chhia a, I-League ah parukna ni mekin game 7 zet a zawna hnehna an chan zawh tawh loh avangin Aizawl FC in an ban thu zanin khan an puang.

Thil chiang tak chu foreign coach rawih an nih hian Indian football an hre lo a, Mizoram football phei chu an hre lo lehzual. AFC Cup khel tur Aizawl FC hian AFC/UEFA Pro License nei coach an mamawh a, hetiang license nei hi Mizo zingah an la awm lo.

The People’s Club hian foreign coach nge Indian coach an rawih dawn tih chu hunin a la hril ang a, amaherawhchu beng tih var nan Indian coach zinga AFC Pro License nei te hi han tarlang ila –

Savio Medeira (India coach hlui hi AIFF Technical Director ni mek leh AIFF hnuaia hna pawimawh tak tak thawk thin a ni.)

Derrick Pereira (FC Goa assistant coach a nih mek avangin sawm chhuah a harsa tur a ngaih a ni.)

V.Soundarajan (I-League club Chennai City enkawl mektu a ni.)

Herring Shangpliang ( Khasi coach tawnhriat nei tha tak a ni a, I-League club Shillong Lajong leh Rangdajied United a enkawl tawh.)

Khalid Jamil (East Bengal coach nilai a ni a, a club hluiah a lokir a rinawm tawh lo.)

Mariano Dias (Coach tawnhriat nei tha a ni a, club football-ah a inhman lohna erawh a rei deuh tawh.)

Santosh Kashyap (I-League coach thawm na ber pawl leh Royal Wahingdoh hlawhtlinpui tu kha a ni a, nikum a Mumbai FC in an ban hnuah hna langsar a thawh hriat a ni lo.)

Hilal Rasool Parray (Kashmiri a ni a, an state chhung club a enkawl ber.)

Thangboi Singto (Shillong Lajong boss hlui hi Kerala Blasters tan a thawk mek a, Northeast-ah awlsam tak chuan a rawn kir lo maithei.)

Armando Colaco (I-League chanchin a coach hlawhtling ber hi a thawm a reh ta hle.)

Ekendra Singh (Ani hian I-League 2nd Division club FC Kenkre a enkawl thin a, coach lar leh tha tia han sawi vul tur a ni lem lo.)

Stanley Rosario (Ani pawh hi Shillong Lajong, East Bengal leh Mohun Bagan lo enkawl tawh a ni a, Indian football-ah a hming lam a khat tawh hle.)

Posted in Aizawl Football Club, Analysis, Ramchhung, Tualchhung.

One Comment

  1. Pingback: Fitflop UK Beads

Leave a Reply

Or