Kum 2001 July thla tir lamah khan English Football transfer chungchanga thil danglam tak a thleng a, chanchinbu mi thahnem takin Arsenal’s Colney an pan khawm. Arsenal-in Ipswich Town atanga Goalkeeper Richard Wright an lak luh chungchanga Arsenal Press Conference hmang tura inngai an ni a; mahse, barakhaihin an awm!
Hemi tum hi chuan Transfer thu thang hriat thawi apiang ziak a, vawrh darhtu leh ri ret ret awm hlek hre thei ber ber te ngei chuan Press Conference neih a nih chhan chu Sol Campbell vang a ni tih an hre lo! Kha Press Conference-a Arsenal-in Tottenham kulhpui Sol Campbell an lak luh thu an puan khan Press mite a barakhaih a, football khawvelin mak a ti a nih kha.
A rawllai hun atanga Tottenham player ni chho Campbell hian kum 14 a nih laiin Tottenham Youth Team captain ni turin offer a lo dawng tawh a; mahse, mawhphurhna dang nei lova ama game-a insawrbing a duh zawk thu sawiin a hnar.
5 December 1992 ah Tottenham first team tana a match hmasa ber khelin bench atangin a lut a, he match-ah hian defender ni chunga goal khung nghalin 2-1 in Chelsea an hneh. Amahah beiseina a san nghal viau laiin manager Terry Venables lakah a tla tlum lova, a la patuai deuh bawk nen, he season-ah hian a inlan zui ta lo.
Mahse, 1993/94 season-ah chuan, left back Justin Edinburgh-a inhliam zar zoin manager thar Osvaldo Ardiles chuan left back atan a chhawr ta a, a hnuah right back lamah te chhawr zui zelin, khawi lam lamah pawh a thawh hlawk a ni tih hmutu manager Osvaldo Ardiles hnuaia awm zui zel turin kum 4 daih contract a ziak ta a ni. Tottenham player pawimawh a ni chho zui zat a, a hun laia Tottenham tlarhnung innghahna a ni a, club lian te mit a la chho thuai nghe nghe a nih kha. Football League Cup 1998–99 ah Tottenham a champion pui a, mi hang captain, Wembley Stadium-a Trophy chawi hmasa ber a ni.
Tottenham tana player tangkai leh pawimawh tak a nih mek laiin, kum 2001 nipuiah chuan a contract a lo tawp ve dawn ta a. Tottenham hian an club history-a player hlawh tam ber ni turin contract thar ziahpui an tum a; mahse, hun eng emaw chen an indawr hnuah Campbell chuan White Hart Lane chhuahsan turin thu tlukna a siam ta a, a chhan tarlan langsar zualte chu Champions League khelh a duh vang leh khatih laia England manager Sven-Göran Eriksson-an club lian zawk zawm tura thurawn a pek vang a ni.
Campbell khan a contract a hmang zo va, eng club pawh zawm dawn se club tan a thlawna lak luh tur a ni. Club dang tan chuan a thlawna Cambell lak luh theih chu a hun lai chuan duhthusam a ni ang. Europe-a club lian tak tak atangin sawmna a dawng a; mahse, a tawpa zawm a duh tak ber chu Tottenham hmelma lian ber Arsenal a ni teh tlat a, mak tih hlawh em emin Arsenal chuan Tottenham tlar hnung hnawh phuitu ber chu a thlawnin an la lut ta a ni. Club history-a player hlawh hnem ber ni tura sawmtu Tottenham kap tih hriat takin Wenger chuan, “Sum leh paiah chuan club lian dangte kan el phak lo mai thei a; mahse, football-a chona thar kan pe ang che,” tiin Campbell a lo welcome a ni!
Spurs monthly magazine-in an kawm tuma, “Arsenal tan chuan ka khel ngai lovang,” tia Campbell-an a sawi hnuah, sum vang pawh ni lo, hlawh chungchang leh club chhung buaina vang pawh ni lo, ‘club lian zawk’ nia ngaih vanga an hmelma Arsenal a’n zawm chu Tottenham fans ten an pai dai thei ngang lo, an khelmuala Sol Campbell inkhel an en leh apiang deuhthawin theihtawp chhuahin an au el a, JUDA tih thuziak nen anmahni phatsantua an ngaih hi an lo dawng sawng thin.
Tottenham fans ten Campbell an huat hian a daih rei khawp mai a, Arsenal chhuahsana Portsmouth tana a khelh hnu, 2009 January thla pawh khan, amah auh nawmnah lama duh thawh zual, tawngkam mawi lo leh chi inthliarna hawi zawnga Campbell lo chhaihtu Tottenham fans pali chu man a ni a, kum thum chhung England leh Wales ram chhungah a hmuna inkhel en thei lo turin hrem an la ni fan! Mahse, sum hmang pawha an chelh zawh tawh loh kha a ni miau va, Campbell-an an club tana thawnthu ngaihnawm lo tak a hnutchhiah chu nawhreh leh theih a ni lo va, Campbell pawh koh kir rual a ni tawh lo, “A lo mak thei ngei mai,” ti chunga thinrima insawh bak tih theih a awm ta lo a ni.
Campbell hi England tan pawh vawi 73 lai a inlan a, defender zingah England ram tana khel tam 10-na a ni. Ani aia England tana khel tam player 23 chauh an awm. Tottenham a zawm hma hian London club tho West Ham-ah a football hun bul lam a hmang. Mahse, khatih laia an Youth Team coach khan Campbell chu Cricket-ah West Indies-in England an hneh chuan a lawm duh hmel thu sawiin fiamthu a thawh a, Campbell chuan a la na viau a, West Ham chhuahsanin Tottenham a pan ta a ni.
Tun hun hi ni ta se, Campbell hian Tottenham chhuahsanin Arsenal a pan ang em ?
