AIZAWL FC I-LEAGUE KHELH DAN THLIR KIR ILA

Hero I-League 2017/18 khelh mekah champion lai Aizawl FC in vawi 18 khel tawhin khelh hmabak an ne tawh lo a, a sang paruk zingah telin I-League leh Indian Super League club te inelna tur Super Cup an khel pha dawn tih a chiang tawh.

Aizawl FC hian vawi 18 khelhah point 54 hmuh theih atangin point 24 an hmu a, vawi ruk chakin vawi ruk ve ve chak loh leh inhnehtawk an nei. An khingpuite lamah goal 21 thunin goal thun tam lamah he thu buatsaih lai thleng hian palina an ni phak a, goal 18 chhuahin goal chhuah tlem ber zinga mi an ni bawk.

Team chakna

Season pum thlirin Mizoram club hian season hmasa angin chakna sawi tur an ngah lo a, club vantlang an ni. He team-ah hian player langsar bik sawi tur an awm lo a, team inkhairual tak an nihna hi an chakna pakhat a ni. Season tir lama che tha lem lo te a hmawr bawk a nih meuh chuan an rawn ‘form’ chho leh a, season pum thlirin player malkhaia che tha bik thlur chhuah nalh tur an awm lem lo.

I-League club zingah home fans nei tha ber pawl an ni a, nikum nen khaikhinin a hmuna entu fans kiam deuhin lang mahse kan population thlirin entu sangthum kan tling deuh ziah a, a tha thawkhatah a ngaih theih.

An chaklohna

Season hmasa sawi loh theih a ni lo a, mikhual te titna hmun ni thin RG Stadium-a point hmuh theih 27 atanga point 17 chiah an hmu hi tun season-a beisei an phaklohna chhan pakhat a ni. Hei bakah hian away match vawi kua (9) an khelhah Gokulam Kerala chiah an hneh a, khualmual atangin point 7 an rawn hawn.

An team pumpui thlirin player-te ‘quality’ in season hmasaa an squad-a pha lo deuh niin a ngaih theih. Season tawp dawna an ban tak Portuguese coach Paulo Meneses-a’n a player te a hriatchian nge hriatchian loh luatah inkhel entu mipuite mak tih turin thutlukna a siam fo a, I-League inelna a hmachhawn hmasak berah beisei a pha lo.

The Coach

Aizawl FC hian I-League match nga (5) chauh khelh tur a awm tawh tihin an coach Paulo Meneses an ban a, an ban chhan ber nia lang chu ‘result tha duh vang’ niin a lang. I-League inelna bikah Portuguese coach hian match 13 khelhpuiin vawi li an chak a, vawi nga an inhnehtawk a, tum li an tlawm. Meneses a ‘win percentage’ hi 30.76% a ni.

I-League a tawnhriat ngah Santosh Kashyap lakluh a nih hnuah vawi nga khelhah vawi hnih an chak a, vawi hnih bawk tlawmin tum khat an in draw. Kashyap-a hnuaiah Aizawl FC hi 40% chak ang an ni.

Coach pahnihte khaikhinin Kashyap-a record a tha zawk a, chutih rualin chakna an chan chhunte hi RG Stadium-a Indian Arrows leh Gokulam Kerala an hnehte kha a nih avangin Kashyap-a tana patla lung khai nan chuan a la hma deuhin a lang.

Player chungchang

Aizawl FC in beisei an phak loh chhoh tan khan Paulo Meneses khan media hmaah player awh nei mahse club in a lakna tur sum a neih loh avangin a hriatthiam thu leh a player neih ang angte tangkai taka hman a tum thu a sawi thin a, ualau takin club thuneitute a sawichhe ngai lo a, an laka a vui thu pawh a sawi ngai lo.

Chutih rualin Meneses hi Indian football-ah mi thar a ni a, a player chhawr that duh loh Lalkhawpuimawia (Mapuia) chu Kashyap-a hnuaia striker hriam a ni a, coach thar hnuaiah Lalrozama Fanai in hmun pawimawh changin Leonce Dodoz-a’n a thiamna a nei let leh bawk. Meneses hian an Japanese striker sawisel hlawh Yugo Kobayashi a chhawr rim avangin sawisel a ni a, record kan en erawh chuan Japanese striker hian game 11 khelin goal 4 a thun a, vawi 18 khela goal 4 thuntu Dodoz nen Aizawl FC player goal thun hnem ber an ni. Meneses-a chhuah rual deuhthawhin Yugo chhuahtir a ni a, Mapuia a lo lang ta.

Santosh Kashyap hian Royal Wahingdoh leh Mumbai FC-a a chhawr hrep tawh leh a player hriatchian Lalchhawnkima a lalet a, tlarhnungah duhthlan tur a ngah phah. Kum 51 a upa Indian coach hi ramchhung football hrechiangtu a ni a, Aizawl FC in Super Cup leh AFC Cup inelna an hmachhawn turah pawh a tawnhriat hi an chhawr hle a rinawm.

Fans te hi

Season liamtaah RG Stadium leng lo khawp mipui kan pungkhawm a, tun season-ah erawh entu tam tum awm bawk mahse season hmasa kan pha lo tih hai rual a ni lo. Hei hi a chhan tam tak a awm thei a, chung zingah chuan ISL nen a ruala khelh a nih tak vang te, Star Sports in HD-a an pek tak vang te, inkhel en man to vang te, Aizawl FC beisei anga an chet that loh vangte leh ‘champion boruak’ kan tem tawh vangte a ni thei ang.

“Season hmasa kha chuan Jeje-a ringawt pawh ticket hralhna tham a ni a, tun tumah chuan a ni tawh si lo a, inkhel en man hi chuan tihhniam deuh nise a tha khawp mai,” tiin Mizo football ziakmi lar tak pakhat chuan Mohun Bagan lokal tum khan a sawi.

Engpawh nise March ni 7 atanga AFC Cup khel tan tur Aizawl FC hian Mizo mipuite tawiawmna a mamawh a, thahnemngaihna vanga kan lo sel ve bawrh bawrh a nih pawhin kan ‘hardcore-na’ hi pawlhdalin awm lo se a duhawm hle ang.