Sneijder a chawl ta

Posted on by C Tlanthianghlima
Estimated read time 2 min read
Wesley Sneijder chuan ram tana inkhelh a chawlhsan thu The Royal Dutch Football Association (KNVB) chuan an puang.
 
KNVB website tarlan danin Qatar club Al-Gharafa tana khel mek kum 33 a upa leh Netherlands boss Ronald Keoman te chu tunhnai khan Qatar-ah an inkawm a, Sneijder hian he thutlukna hi a siam ta a ni.
 
“Qatar ka pan khan ram tana a dinhmunah nghawng a nei dawn tih ka hre sa a. Chubakah Keoman hian player naupang zawkte nen team thar din a duh tih ka hria a, a thutlukna hi ka zah a ni,” tiin Netherlands kawr ha ngun ber Sneijder chuan a sawi.
 
Oranje boss Keoman pawhin Sneijder a koh tawh dawn loh chhan sawiin,” Sneijder hi tunhnaia Dutch player tha ber zinga mi a ni a, player ropui tak leh record nei tha tak a ni. Ram tan team thar din ka duh avangin thutlukna siam a ngai si a, thlauh thlak pawl an awm a ngai ta a ni,” tiin a sawi.
 
Wesley Sneijder hian kum 2003 atang khan ram tan khel tanin kum 18 a nihin ram tan a inlan tawh. Nikum November kha ram tana a inlan hnuhnun ber niin vawi 133 khelhah goal 31 a thun a. Ram tan FIFA World Cup vawi thum (2006,2010,2014) bakah Euro vawi thum (2004,2008,2012) a khel.
 
Euro 2008-ah Sneijer a langsar a, Team of the Tournament-ah telin thiante tana goal siam sak hnem ber (top assist provider) a nih bakah France laka a goal thun chu Goal of the Tournament atan thlan a ni nghe nghe,
 
Kum 2010 FIFA World Cup-ah a vanglai hmangin Netherlands chu final luhpuiin final-ah hian Spain lakah si khat faiin an chak lo. Hemi tum hian Silver Ball leh Bronze Boot a dawng kawp a, World Cup Dream Team-ah a telphain kum li hnuah Netherlands chu pathumna a nihpui leh bawk.
Avatar for C Tlanthianghlima
C Tlanthianghlima

Football tui ve tak

You May Also Like

More From Author

18Comments

Add yours

+ Leave a Comment