Di Cristina Hospital-ah nausen Mario-a surgery hmasaber chu hlawhtling taka neih a ni a. Amah pawh a ṭha a, a rawn harh hnu chuan a zia a zawi khawp mai. A na tawrh te a ziaawm deuh tawh a, dam ṭha pangai tur erawh chuan hun ala mamawh rei deuh ang. Naupang damdawi in ah enkawl a ni a, surgery hmachhawn leh tura ruahman a ni.
Mario-a nu chu a fapa mutna khum bul a ṭhuthleng ah chuan a lo muthlu nasa mai a. Ṭhuthleng ban chu delh sualin a phu deuh zawk mai. Amah ngaihvenin nurse a rawn lang nghal, “Ohh, ka tihpalh, ka lo mutui deuh a nimaw.” “Haw tur ka ni a, mahse…Ka kalsan thei lo a ni,” tiin Nurse hnenah chuan a hrilh.
Zan lam nurse duty chuan “Lukham ka lo lak ang che. I awmpui dawn a nih chuan rei lo te tal chu mut hahdam I mamawh ang.” tiin Rose-i hnenah chuan a sawi a. Lukham chu laksakin a let leh thuai a, Rose-i chu lo muhil leh hmanin a thutna bul naute khumah Mario pawh a lo muttui ve hle bawk.
Chu pindan ah chuan Nurse Angela-i pawh Mario-a te nufa ngaihvenin a rawn lut ve a, “Ka haw hma in ka rawn tlawh zuai,” tiin a Nurse lo awm mek hnenah chuan a sawi a, Nurse chuan a beng bulah, “A awmpui duh a,” tiin a lo hrilhru.
“Ka dem hran lo e. Keipawhin ka tih ve tur tho a ni,” tiin Angela-i chuan sawiin Mario mutna sirah chuan thawm dim takin a phei a. A lukham tereuhte chu siam that sakin a hnuaiah chuan thil engemawni awm tlatin a hria. Hriatchian tumin a han zen chuan Pathian Lehkhabu Thianghlim a phawrh chhuak hlawl mai.
“A pa in khatilai hmun a awm tur khan a duh a,” tiin hlim hmel pu sang chungin Nurse chuan a lo sawi.
Mario-a nu Rose-i chu zingah damdawi in chhuahsanin a hnathawhna lam a pan ding nghal a. Ani hi mi in tifai a inhlawh thin a ni. Tin, Mario pa Thomas-a chu an chenna in aṭanga hmun hla tak tuipui kam lam panin hnathawk turin a liam ve thung. An pahnihin thahnem ngai takin hna an thawk ve thin tak na a, mahse an fapa damlo mek enkawlnan an sum lakluh ala bei tham hle. An harsatzia hriatpuitu Di Cristina Hospital a Pediatric nursing staff te chuan surgery an tih leh hma zawng chu a thlawn vekin an lo buaipui thin a ni.
Nitin zantin mai chu Rose leh Thomas ten zanriah an kil zawh velah Rose-i’n damdawi in lam a pan nghal thin a. Mario mutna khum bul a ṭhuthleng ah chuan a fapa awmpuiin a ṭhu a, tlaivar chang lah a ngah hle.
Ni a ral zel a, thla a tling ta hial mai. Zantin Rose-i pawh chu damdawi in ah chuan hun a hmang ve zel a. Nurse Angela-i chuan Mario chu a ngainain a fapa ang maiin duat takin a enkawl thin a, a chungah Rose-i pawh a lawm khawp mai. Mario pawh surgery vawi khatna a hmachhawn hnuah dam lam a pan ve zel a, Angela bakah staff dang te pawh chuan Mario hi an ngaina hlawm hle. Mi hip theihna riau a nei te pawh a ni mahna.
Kum 1990 December thla a ni a, Angela-i leh a staff te chu damdawi in ah chuan inhmukhawmin thil a rel ho a. An sawiho zawhah chuan Rose-i leh Thomas Barwuah-a te hnen a thil sawi a hun chiah niin an hria.
Angela-i chuan, “Kan lo sawi khawm a, Krista hming a Baptisma chantir kan duh a ni. Mario pual hian party tenau kan lo buatsaih ang,” tiin Rose leh Thomas Barwuah te hnenah chuan a ngen a, Nurse dang te pawhin an lo tawiawm ve bawk.
“Kan fapa hi Baptisma chantir in duh a maw?” tiin mak tih hmel takin Thomas chuan a lo chhang a.
Angela-i chu a lo bu nghut a, “A hun tawhin kan hria,” a ti zui sap.
Thomas-a chu puithu hmel zetin a rawn ding chhuak. Eng thil tak sawi ang maw tiin Nurse ho chuan an lo huphurh hmel hle. A hnu rei lo teah chuan a hmel urhsun zet chu hlim hmelin a rawn thlak a. A ban sei ve tak mai chu pharin a kal hnai a, an za chuan an inkuah ta dual mai.
“Lalpa’n malsawm che rawhse, Angela. Ngaituahtuahna tha tak a niin kan hria. A ni lawmni Rose?” tiin a rawn tawng chhuak a.
Rose-i chuan phur zetin. “Tehreng mai!” tiin a lo chhawn thuai a, “In zavai mai hian, kan tan hian in van ṭha tak em. In awih lo zawk maithei a, Thomas nen hian baptisma chungchang hi kan lo sawi ve mek tak asin. Chuan maw Angela,” tiin Head nurse Angela chu a kuah zui a. “
“Zan tam tak he hmunah hian hun ka hmang tawh a, ka tan hian I ngilnei takzet a ni. Mario-a Godmother ah min ṭan sak thei ang em?”
