Thomas-a te nupa chuan Social Worker chu an hmu ta ngei a, an fate tan hmun nuam zawk zawn sak turin an ngen. Mahse an dil hunlai hian mi inhawng an lo awm remchang mai lo a, mahse Social worker chuan tanpui ngei tiamin an inthlah.
Foundry-ah Thomas pawh a thawk chhunzawm ve zel a, a nupui Rose pawhin tunhma a thawh thin mi in tihfai hna a thawk lehta. Bagnolo Mella a in lian lo ve takah chuan an khawsa ve naw naw a, kum 1993 khan Thomas te nupa chuan fapa Enoch-a an nei leh a. Mario erawh kum thum mi niin an kawtkai ah te pawh a tei kual thei tawh thung
Mario pa hian an TV ah inkhel a en peih ve thawkhat a, a fapa pawhin a pa inkhel en aṭangin Football chinchang a lo hriat ve phah. Ni khat chu a nu nen an chhuah vahnaah Football hlui ve tawh tak mai a chhar hlauh a. Chu ball a hmuh chuan awh hmel takin a thlir dauh dauh mai a, a nu bak chu an bul hnai ah awm an awm lo bawk a.
Rose chuan,“Kal rawh Mario, miin an duh tawh loh a nih hi. A tha tawh lo emai” a ti a. Mario hian a ball chhar hi a hlimpui ngang mai. An haw lamah chuan Rose-in kaih a tum ngial pawhin a Ball thar hi a pawm deuh reng.
Thomas chuan Rose-i te nufa lo haw a hmuhin, “Pet rawh le, Mario!” tiin a fapa chu a lo au thuai a. Mario chu dingin a Ball chu a thlek deuh vang vang phawt a, ti chuan an in bang rinchhan chuan a pet deuh ngar ngar mai.
Tumkhat chu a nuin eirawng a bawl laiin Chokq pindan kawngka-ah a Ball hi pet lutin a nu hmuh tura ban pharin a celebrate ve nasa viau a niawm e.
Ni engemaw zah a liam hnu chuan Vincenza-ah Thomas te chhungkua chu an thiante tlawhin an kal a. An thiante hian Mario ang tiat lek naupang an nei ve bawk a. Mario chuan chu naupang nen chuan a Ball chu petin nuam an ti khawp mai. Darkar a liam hnu chuan ruah a rawn sur a, mahse naupang te chuan infiam chu an thulh phah chuang lo, ruahsur hnuaiah an inkhel ve nasa mai.
Tlai lam a lo nih chuan, Mario leh a thian thar chu an ruah do avanga huh zawr hnuang a an let chu an pa te chuan an lo hlimpui hle mai a. Thomas-a thianpa chuan Mario hnenah chuan, “Nang hi, Super Mario i lo nih ngei hi!” tiin a lo fiam a. Naupang ho pawh chu an nui ve dar dar a, ni dang a infiam leh turin an intiam a.
Mario hian video game lar zet, Mizo pawhin a kan hmel hriat em em fictional character Super Mario hming hi a duhin mawi a ti phian a, hemi ni atang hian hminglem atan a pu chhunzawm ta a ni ber. An haw lam chu motor chhung chu a reh thiap mai a; Mario, Abigail leh Enoch te chu tui takin an muhil a. Mario leh Enoch phei chu motor atanga khum a an mut tir thlengin an harh miah lo.
A tuk zingah chuan Rose-i chuan Choka tukverh atangin verandah-ah a pasal chu mipa leh hmeichhia nen a an ding a hmu a, chumi te pahnih chu felfai takin an inthuam a, a mipa zawk chuan suitcase leather ațanga siam hi a khai.
A thil khai chu hawngin a chhunga lehkha chu Thomas hnenah a pe a, Thomas-a chuan a chhiar a nuap nuap a, a chhiar pah chuan a bu nghauh nghauh bawk. Thomas chu choka lam a rawn hawi a, Rose-i nen an mit chu a intawng chiang viau.
Kutzaizirin Rose chu a ko ta. Rose chuan tute nge an nih a hre thuai a, a lungchhe nghal hle. Thawk han la te te phawtin an titi na a tel tur chuan a chhuak ve a.
Mikhual te pahnih chuan Rose-i hmel an hmuh chuan polite tak a khi sang chungin “Social Service lam atangin a nia” tih pahin chibai an lo buk thuai a. Rose-i chuan a thil ngaihtuah mek chu a hmelah lan chhuah tir loh hram tumin “Ka hria che u alawm, inrawn kal chhan pawh ka hria e,” tiin an chhang a.
