Tlailam a lo nih chuan Franco chuan a Fiat chu tuai virin an chenna Concesio lam panin an tlan a, an in kawt an han thlen chuan Mario chu phur zetin a chhuak ve vat a, a thawm pawh a ring ṭha e. Balotelli te in lian leh ropui zet mai chu a chhip hmuh phak ngei tumin a ring a fan nasa hle.
A tan chuan a hmuh tawh a in sang ber a ni a, an awmna bul hnai maiah jackhammer hmang a hnathawk thawm lo ri bengchheng ve bawk nen a beng chu a hup a, “A na,” tiin a au chul mai.
Franco chuan leihnuai lamah rel kawng siam mek an nih thu te a hrilh a, Mario chuan bang bo hmel takin a ke chu a en a, “A hnuai ah hian maw?” a tih deuh hu mai.
Silvia-i’n nui deuh huah huah chungin, “Aw ni e, Mario. I ke hnuai ah khan Prealpino Metro Station atanga St Eupheimia pan tur an tlan tlang dawn alawm. Nakinah an rawn tlan hunah chuan ri deuh dur dur pawh kan hre thei ang” a lo ti a.
Franco-a’n Silvia banah kaiin an in kawngka lam an pan a, an han hawi let chuan Mario-a’n a zui ve reng reng lo tih an hmu thei.
“Lo lut rawh Mario, i pindan tur kan lo hmuh ang che,” a ti a.
Mario erawhin a ke lam chu a kawk a, “Rel lo tlan hun ka nghak alawm,” tiin.
Silvia leh Franco te nuih a ti za ngei mai. “Oiii Bawihte, vawiinah chuan a lokal dawn hleinem. A kal kawng tur an la siam mek chauh alawm. Nakinah a tlan theih hunah chuan nangpawh i lian tawh viau ang” tiin Silvia chuan a hrilh a, Mario chu a hruai lut ta.
Mario hian a Ball serthlum rawng uk ve tawh tak mai chu a ban pakhatin a keng a, a lehlamah a car sen lem chu a keng bawk.
Tichuan an chaw ei dawhkan sei zet chu Mario pawhin a kil ve a. A chhungkaw thar te hmel chu thlir kual velin Franco leh Silvia te bakah a unau thar John, Conrad leh Cristina te pawh an awm ve a ni.
Rose-i’n Mario hnenah Balotelli te chhungkua chu mi fel tak an nih thu leh hun rei lo te chhung atan chauh a awm rih tur thu a hrilh a. A tirah chuan Mario hian a hreh ve khawp mai a, mahse an car-ah a luh hnuin a hlauh thawnna te a reh zui.
Chawhmeh te lah chu an ngahin an nei tui hlawm bawksi a, ala hmuh ngai reng reng loh deuh hlir mai an hmeh. Balotelli chhungkua chuan Mario thil ei lai an thlir thup a, a titi chu ngaithlain an nui leh dar dar ṭhin. A nikhatna atangin an ngaina nghal hle.
Mario awm tak avangin Balotelli te in chhung boruak chu a nawm phah hle a. Mario hian an in lam a a chhungte chu ngai ve ṭhin mahse a awmna thar ten an duat em avangin a tlei thei khawp mai.
Thla engemaw zah liam hnu chuan Mario chuan TV-ah Diego Maradona ball khalh lai chu a hmu fuh a, mit khap lek lovin uluk zetin a bih hnai nghal. Chumi hnuah a Ball serthlum rawng ngei mai hmang chuan Maradona chet dan ang chu a zir ve nasa mai.
Silvia chuan a thawm chu hriain choka atangin a rawn chhuak a, a beng bul lawkah ball a rawn thlawk fua. Chu ball chu Mario-a’n a rawn um thuai a, a let leh lam chu Silvia chuan lo manin, “In chhungah ball pet tawh suh tih ka hrilh che em?” tiin a zawt a.
Mario chuan inthlahrun hmel zetin, “Aw,” tiin a lo chhang.
Silvia erawhin ṭawngkam nem zawkin, “Ka ti hleinem,” a ti ta daih. “Hemi ball hi chu in chhungah chuan pet tawh suh tih ringawt alawm ka sawi,” a ti a. Mario tan ball thar, a dup deuh zawk rawn la chhuakin, “Pawnah chuan ball pangngai hi i pet anga, mahse in chhungah erawh hei hi i hmang tawh zawk dawn a nia,” tiin a hrilh zui.
Mario chuan a Ball serthlum rawng chu dah ṭhain a nuhrawn hnen atangin chu Ball nem chu a la a. Corridar lamah phur zet a pet nghalin a ball han khalh dan vel chu Silvia pawhin a lo lawm ve hle.
“Hey! Khawi atangin nge khatiang te kha i zir?”tiin a au a. Mario chuan “Maradona” tiin a lo chhang let ve thuai.
A duh tawk hnuah a ball thar nen chuan an in bul a thingkung lian takah chuan a lawn a, thingzar lian leh sang laiah chuan a fu vang mai. Helai hmun hi a ngaina ve hle a.
A pahrawn Franco rawn haw hma chu lo nghahnan a hmangin, a chhuk hnuah choka lam a pan a, “Enge i ei chak? tiin Silvia chuan a lo zawt thuai.
“Carbonara,” tiin Mario hian a chhang.
Silvia erawhin,“Chung aia thlan tur tha zawk chu a tam asin” a lo ti a.
Mario chu a bu nghut a, mahse a nuhrawn thusawi chu a pawmpui loh hmel hle. He nau hi a thil duhah hian a chiang em bawk a ni.
