Dinliana’n Chencho a dahtha – Zara

Posted on by C Tlanthianghlima
Estimated read time 2 min read
Tun season I League-a hming langsar ber tiha chhal ngam Chencho Gyeltshen chu Aizawl FC defender R. Laldinliana lakah a thamral a, Mizo tlangval Dinliana hi Mizoram Premier League Season 6-a best defender kha niin I League a vawi khat khelhna a ni.

MPL-ah Dinliana hi Chhinga Veng tan khelin goal venhim bakah goal nawr kawngah a tangkai a, tharum a ngah tel bawk avangin India ram football-a thleng sang thei turin theihna a nei. MPL6 best defender ni mah se Aizawl FC-in Lalrinzuala Khiangte an neih avangin khelhna hmun a chang mai lo a, Armed Veng South tlangval Dinliana chuan, “Coach hian vawi khat tal chu min rin ngam ve se ka ti khawp mai,” tiin ZoFooty palai a hrilh tawh.


Minerva Punjab nen Rinzuala damthat loh vangin Dinliana’n khelhna hun pek a ni a, Chhingcows atanga Aizawl FC zawmtu hian a match khatnaah Chencho chu che thei loin a siam a, hei hi duh tawk mai loin Minerva left back Abishek Ambekar tan pawh buaina tham a tling.

Aizawl FC-in I League match hmasa lamah H. Lalmuankima awmna mual vei lam chu an goal nawrna ber ni mah se Dinliana awm hnuah erawh Ivorian winger Leonce Dodoz a thlawp that avangin AFC goal nawrna chu dinglam a ni. Dinliana hian I League a match khatnaah Chencho che thei loin a siam a, Mizo mipui thahnem takin Cristiano Ronaldo nena an khaikhin Bhutanese forward hmu châk mah se an beisei lo lam zawk an hmu a, Armed Veng South tlangval Dinliana that zia an hmu.

Dinliana’n coach Paulo Meneses rinna chu khelmualah a lantir a, Portuguese coach tan December 31-a Gokulam an hmachhawn hunah uluk zawkin a ngaihtuahna a sen a tul dawn. Mizo tlangval pahnih Dinliana leh Rinzuala te a buk a dawn a ni.

Avatar for C Tlanthianghlima
C Tlanthianghlima

Football tui ve tak

You May Also Like

More From Author

25Comments

Add yours

+ Leave a Comment