FIFA IN AIFF A KHAK

Football khawvela thuneitu sang ber FIFA chuan India ram a football thuneitu All India Football Federation (AIFF) chu pawn lam mi inrawlhna tel lo a an pawl kal pui turin a hriattir.

FIFA in AIFF lehkha a thawnah hian tunhnaia Delhi High Court in AIFF hruaitute chungthu a rel chungchang chiang zawk a an hriat duh thu te, hmalak an tum dan te leh FIFA hnuaia ram zawng zawngte chu pawn lam (third party) tel lo a anmahni inrelbawl tur a beisei an nih thu a chuang a ni.

Tarlan tawh angin Delhi High Court chuan tunhnai khan AIFF President Praful Patel leh a thawhpuite thlan an nih dan chungchangah dan bawhchhiatna a awm nia a hriat avangin thla nga (5) chhung a inthlang tha turin a hriattir a, an buaina ching fel turin Chief Election Commissioner hlui Dr.SY Quraishi a ruat bawk.

AIFF in hetiang harsatna a tawh takah chuan a hmalam hun hriatthiam a har ta hle a, third party te inrawlh vanga hrem tuar Pakistan, Kuwait leh Guatemala te hnung a zui mai ang em tih chu zawhna awm thei tak a ni.