2020–21 Hero I-League Round 8 – na chu vawiin chawhnu hian khelh chhunzawm leh a ni dawn. Tun season I-League khelhphung hi kumdang aiin a dang hret a, team 11 te hi vawi khat theuh an inkhelh kual (phase 1) hnuah a point hmu sang club 6 te chu Group A- ah awmiin a hniam lam club 5 te chu Group B – ah an awm ang.
Group – A hi champion tur zawngin vawi khat theuh an inkhel kual leh ang a (phase 2), tichuan phase 1 leh phase 2 – a point belhkhawma hmu sang ber hi champion an ni ang. Group B erawh vawi khat theuh an inkhelh kual hnua a point hmu hniam ber an relegate dawn a, hei hian club thar Sudeva leh Indian Arrows a huam lo thung.
Tun dinhmunah Vanlalduatsanga leh Lalengzama Vangchhia te khelhna Churchill Brothers in vawi 7 khelhah point 13 hmuin hma an hruai mek a, chak loh an la nei lo. An hnuaiah hian Roundglass Punjab (11 pts), TRAU (10 pts) Mohammedan (10 pts) leh Real Kashmir (10 pts) te’n hnaih takin an um mek.
Vanlalbiaa Chhangte leh Biaklian Paite te telna Mohammedan hi chak loh la nei lo an ni a, hmahruaitu Churchill aiin game khatin an khel tlem bawk. Sena Ralte leh Lalrindika Ralte te khelhna Real Kashmir hi chak loh la nei lo bawk an ni a, hmahruaitu Churchill aia game khelh tur an la ngah zawk bawk avangin an dinhmun a chhe lo.
Aizawl FC hian game 6 khelin point 8 an hmu tawh a, table – ah 8-na an ni mek. An khelh hmabakah Sudeva, Mohammedan, Real Kashmir te hmachhawn a la tul dawn avangin champion tur chuan theihtawp an chhuah lehzual a tul ang.
