2018 FIFA World Cup khel tur a tling zo lo Italy in hun rei lo te chhunga Roberto Mancini hnuaia ‘team thar’ an rawn din leh dan hi a ngaihnawm a, Italian manager hian fak a phu hle.
Kum 56 a upa hi football khawvela manager hlawhtling a ni a, club lian tak tak Fiorentina, Lazio, Inter Milan, Manchester City, Galatasaray leh Zenit Saint Petersburg te lo enkawl tawh tu a ni. Management lama a luh tirh hian Lazio – ah England manager hlui Sven-Goran Eriksson a hnuaiah a thawk thin.
Manager hlawhtling a nih ang bawkin footballer hlawhtling a ni a, amaherawhchu a hunlaia Italian footballer tam tak angin Milan emaw Juventus emaw Napoli – ah a khel ve lo a, ram tan hming a chher hek lo. Italian club lian lem lo Sampdoria hi a hming chherna ber a ni a, mahse chu Sampdoria chu Italy in Euro 2020 final an luh theih nan a kawng pawimawh tak a lo ni. Mancini hian kum 1982-1997 chhung khan he club tan hian a khel a, game 566 khelin goal 168 zet a thun.
Kum 2018 World Cup an tlin zawh loh hnuah Luigi Di Biagio thlakin Italy manager a ni tan a, Sampdoria – a a khelhpui thin a thian te amah pui turin a sawm hlawm. Hetih laia Italy U-20 enkawl mektu Alberico Evani chu a assistant coach atan a lalut nghal a, Sampdoria – a a khelhpui thin dang Giulio Nuciari leh Fausto Salsano bakah hna nei loa awm reng tawh Attilio Lombardo te chu sawm chhuakin vawiin thlengin a assistant coach tangkai tak an la ni reng.
Tichuan kum 2019 khan Sampdoria tana a khelhpui thin leh a thian tha em em amah Mancini ngeiin “Ka unaupa ang mai a ni” a tih cancer avanga in enkawl mek Gianluca Vialli chu kum 2013 atanga Italy national team in an neih tawh loh Head of Delegation atan a sawm chhuak bawk.
Mancini leh Vialli te hi Italian football – a player inkawp fuh ber zinga ngaih an ni a, kum 8 zet Sampdoria tan khel dunin ‘goal twins’ tia hriat lar an ni. 1990/91 season khan Sampdoria hi Serie A – ah champion puiin hei hi kum 1946 – a din Sampdoria in Serie A nomawi an chawi hmasak ber leh awmchhun a la ni. Hei mai bakah Coppa Italia nomawi tum 3 zet chawipuiin UEFA Cup Winners’ Cup – ah an champion pui bawk.
Thawnthu lungchhiathlak erawh a awm a, 1992 European Cup (tuna Champions League) final – ah Johan Cryuff a enkawl Barcelona hmachhawnin extra-time a Ronald Koeman a free-kick hmangin 1-0 in an hneh ta lo. Heta an inkhelhna hmun hi tuna Euro 2020 final khelhna tur Wembley Stadium ngei hi a ni ! European Cup – a an champion zawh loh hnuah Vialli hian khawvela footballer man to ber ni turin Juventus a pan a, an khel dun leh ngai ta lo. Player pahnihte’n Sampdoria tana a goal thun belhkhawm hi goal 309 zet a tling.
“Vialli nen hian kum tam tak kan inhre tawh a, seilian dun chu ni em lo mah ila ka tan chuan unaupa ang mai a ni,” tiin Mancini hian Italy team tana a thawhpui cancer dam leh Vialli nen an inkar a that thu a sawi.
July ni 11 a lo thleng ang a, Wembley Stadium – ah ngei mai Euro 2020 final chu khelh a ni dawn. He khelmualah hian hian Gianluca Vialli hian Chelsea manager a nih laiin 2000 FA Cup a lo chawi tawh a, Mancini pawhin kum 2011 khan Manchester City chu FA Cup a lo chawipui tawh bawk. Amaherawchu heng Italian pachal pahnih duh ber tur chu 1992 European Cup final – a an mangchhia nawhreh a ni ang.
