Asia khawmualpuia football club upa ber Mohun Bagan chu season thar atangin ISL team ATK nen an inchhunfin dawn a, Mohun Bagan hming fir tak kha a bo dawn ta.
Mohun Bagan Athletic Club hi August 15, 1889 khan Bengali mi hausa chhungkaw 3 inthurual ten an din a ni a, Bhupendra Nath Bose chu president hmasa ber a ni. Kum 1094 khan Coochbehar Cup-ah champion-in an trophy hmasa ber an chawi.
Kum 1911 July 29 khan IFA Shield final-ah 2-1 a East Yorkshire Regiment hnehin an champion a, India club zinga IFA Shield-a champion hmasa ber an ni. Hemi tum hian Bagan player te hian ke lawng ngata an khelh laiin sapho erawh thuam famkim nen an che chhuak thung. India mite rilruah indan a len tawh avangin rampum tan hnehna ropui a tling.
Kum 1939 a Calcutta Football League a an champion hnuah hma an sawn zel a, 1933-39 chhung khan trophy 29 zet an chawi. Hemi hun chhung hian Kolkata Derby-ah an hmelma kumhlun East Bengal nen vawi 23 zet inhmachhawnin a chak zawkah vawi 12 an tang. An ropui vanglai a ni.
Kum 1947 khan IFA Shield-ah champion-in India independence hnua champion hmasa ber an ni. 1954-ah ‘Green & Maroons’ hian IFA Shield leh Calcutta Football League title la kawpin title la kawp thei hmasa ber an ni a, kum 1977 khan tuma la tih theih ngai loh tiin IFA Shield, Durand Cup leh Rovers Cup title an la vek.
Kum 1977 hian hetih hunlaia Brazilian footballer ropui Pele khelhna New York Cosmos nen an inhmachhawn a, Eden Gardens-a an inkhel hi a hmunah mi 80,000 zetin enin 2-2 in an inhnehtawk.
Kum 1978 khan IFA Shield-ah Soviet Union club FC Ararat Yerevan nen final-in 2-2 in an inhnehtawk a, champion-a puan zui niin India zalen hnua IFA final a Asia pawn lam club hmachhawn hmasa ber an ni.
Kum 1989 khan an kum 100 tlin lo lawm tawhin hemi tum hian Prime Minister Rajiv Gandhi chuan “National Club of India”-ah a puang a ni.
Kum 2008, May 27 khan Salt Lake Stadium-ah German international, Oliver Kahn-a thlahna match-ah Mohun Bagan leh Bayern Munich inhmachhawnin Kahn bakah Ze Roberto leh Toni Kroos te an inlan.
I-League (national league) league title 5 la tawhtu hian kum 2016 January thla AFC Champions League qualifiers-ah Singapore club Tampines Rovers hnehin India club zinga second round thleng hmasa ber an ni a, March 9, 2016 AFC Cup-ah 4-0 a South China hnehin India club zinga AFC Cup inelnaa khual muala chak chiang ber an ni bawk.
An mual hman ber, 76.40 acres zet awh Salt Lake Stadium or Vivekananda Yuva Bharati Krirangan-ah hian inkhel entu mi 68,000 zet lengin a tul danin seat 85,000 thleng hun belh theih a ni. Kum 2011 a siamthat a nih hma phei kha chuan mi 1,20,000 lengin khawvela stadium lian ber dawttu a ni thin. Kum 1989 phei kha chuan khawvela stadium lian ber a ni.
Chhinchhiah theih china he stadium-a inkhel entu tam ber tum chu kum 1997 Kolkata Derby match-a Federation Cup semi-final a East Bengal nena an inhmachhawn tum kha niin a hmunah mi 1,31,000 zetin an en!!
Kumin January 16 khan ATK neitu RP-Sanjiv Goenka Group chuan Bagan-a share 80% zet leiin neitu nihna pumhlum a nei ta, ATK nen June 1 atang hian chhun finin ISL ah an inlan taw hang.
Atletico de Kolkata (ATK) hi Spanish club Atletico Madrid nena thawk dun thin niin an club hmingah pawh Atletico tih an pu tel a, Atletico Madrid nena an inremna anga Spanish club-in hma an lak loh avangin an thawh dunna an ti tawp a, hemi hnu hian an club hming lampum ATK lampum pawh Amar Tomar Kolkata (Bengali) tihna a ni e, an ti zui.
Football tlak nat lohna ramah Mohun Bagan leh East Bengal hian kum 100 chuang zet football an lo chawi nung tawh a, awm lo se zawng india football hi hman hmanah a tiltiak tawh ang. Bagan hian I-League champion ni chungin an hun tawp an khar.
