Crystal Palace lakah Arsenal dawl zawrin an zawr a, mual neitu Palace chuan si thum faiin mikhual Arsenal an lo hneh.
Arsenal captain hlui pahnihte enkawl team inkhelah Patrick Vieira a chungnung zawk a, club lian lo zâwka ngaih hi Selhurst Park-ah team chungnung zâwk an ni a, phû takin hnehna an chang.
Vieira teamten inkhel tir aṭangin Arsenal an nawr tawm nghâl a, ‘pressing game’ khelin hei hian Arsenal tlarlaite ball inpe tur an dang hneh hle a, Gunners lamin an midfielder-te hmangin game an khaiding hleithei lo. Palace playerten an hnaihchilh zung zung avangin Arsenal tlarhnung ball inpe kual tur pawh an talbuai zing hle.
Kieran Tierney a inhliam avanga a aiawha lût Arsenal left-back Nuno Tavares a talbuai hle a, North London club in goal an chhuah hmasak pahnihah a tih tur a ti lovah a ngaih theih a, second half ṭan dâwnin thlâk a ni nghê nghê.
Palace in team game ṭha tak an lantir a, Wilfried Zaha chuan a tih dân ṭhin pangngai angin an tumpui tlarhnung a chhaih buai leh hle a. Penalty hlawhchhuakin hei hi goal-ah a chantir zui a, tun season Premier League-a a goal 10-na a ni.
Inkhel pumpui thlirin Patrick Vieira’n khelh dân tura a ruahman ang thlapin Palace an khêl niin a lang a, chumi letling chiah chuan a fuh lo thei lai zawng zawng a fuh lo emaw tih turin Mikel Arteta teamte an khêl ve thung a. Nidang hmuhnawm êm êm ṭhin Thomas Partey leh Martin Ødegaard te an khêl ṭha lova, Norway captain phei hi chuan penalty a chawi nghê nghê a ni.
Palace hian khelh 30-ah point 37 hmu in 9-na dinhmun an luah a, tunkar tâwp Pathianniah Leicester City khelmualah an lût zui ang.
Arsenal hi khelh 29-ah point 54 hmu in 5-naah an awm chhunzawm a. Inrinni-ah tun season tira an lo draw tawh Brighton an lo mikhual dawn a ni.
Crystal Palace 3-0 Arsenal (FT)
CRY: Jean-Philippe Mateta 16′, Jordan Ayew 24′, Wilfried Zaha 74 (P)
