Parlai tlaini a liam

‘End of an era’ tih hi saptawnga an hmang kan hre fo a, La Liga club tha Atletico Madrid tana an captain Diego Godin, Antoine Griezmann, Felipe Luis leh Juanfran te chhuak ta hi an tan chuan ‘end of an era’ diktak a ni !

Heng player pali te club tana an game khelh belhkhawm hi 1,334 zet a tling ! Sum ngah Real Madrid leh Barcelona te nekna karah pawh La Liga nomawi an chawi thei a, tum hnih ngawt Champions League final an lut thei a, Europa League – ah pawh an champion thei.

Kum 33 a upa Godin hian kum 2010 atang khan Atletico tan a khel tan a, Juanfran leh Felipe Luis te nen tlarhnunga an inkawp kha an vanglai chuan Europe – a a tha pawl an ni thin. Champions League Squad of the Season – ah vawi thum a lang tawh a, La Liga Best Defender pawh a ni tawh. Atletico ti ‘Atletico’ tu te zinga mi a ni.

Kumin August thlaa kum 34 tling tur Filipe Luis hi a football zinkawng hmasa lamah a talbuai ve hle a, kum 2010 – 2014 leh 2015 – 2019 chhung erawh Spanish club tan hlawhtling takin a khel thung. A vanglai khan a position hi midang chuh ve phak loh emaw tih turin a luah lum hneh a, player langsar vut ni lo mahse Atletico tan mi langsar a ni.

Real Madrid hnawl hnu Juanfran pawh hi kum 34 a upa a ni tawh a, Atletico tan game 355 a khel tawh. Nomawi hlu tak tak an chawi tuma an player tha a ni a, Atletico tan chuan ani tluka ‘legend’ hi an awm thei chuang lo ang.

Barcelona zawm ta Griezmann hi an club chanchina player man to ber lo ni tawh a ni a, game 256 khel a goal 133 thuntu a ni. Cristiano Ronaldo leh Lionel Messi te karah pawh nep bik lo, La Liga Best Player ni tawh ngat kha a ni.

Heng player pali te hian Atletico Madrid tana an tih theih hnuhnung an ti tawh a, an boss Diego Simeone in season tharah anni tellohna ‘team thar’ a din a tul dawn ta.