Borussia Dortmund in £100m chuang chauhin Jadon Sancho chhuahtir an phal a, amah ngaihventu Manchester United erawh chuan £50m aia tam sên an inhuam lo tih Sky Sports chuan an tarlang.
Dortmund a kum 2 daih contract la nei Sancho hi United nen nasa taka sawi zawm ni mahse dân ang thlapa club leh club indawrna a la awm lo niin Sky Sports hian an tarlang a, tin tunlai hripui avanga khawvel pum a buai avangin club hausa ni mahse Manchester United hian player pakhat manah sum hlawm tam tham tak hman chu an tum lo niin a lang a ni.
Tun season Bundesliga a goal 17 khunga assist vawi 16 nei tawh Sancho hi Dortmund CEO Hans-Joachim Watzke chuan an hralh dawn a nih pawhin a man an chhiar zât pe thei hnenah chauh hralh an tum thu a sawi a, tin ‘Coronavirus discount a awm lo’ tiin a sawi bawk. Hetiang a nih chuan £100m china lei ngam hnenah lo chuan Bundesliga club hian Sancho hi hralh an tum lo bur a nih hmel.
