Aizawl FC hmachhawn tur a lo zin NEROCA defender Gouramangi Singh chu ZoFooty in kan be fuh thei hlauh a, India defender hlui hian vawiin chhun khan hun min pe thei a, Aizawla lo zin chu a phur thin hle tih ZoFooty palai a hrilh.
“Tun hi vawi thum ka lokalna a ni a, Mizo footballer thian nei nual mah ila lo zinna hun hi ka nei tam tawk lo thin a. S.Malsawmtluanga (Mama) hi TFA-a kan senior a ni a, kan dahsang thin hle. Jerry Zirsanga, Vanlalrova leh Malsawma te kha ka batchmate an ni bawk. DSK Shivajians tan a ka khelh lai leh FPAI exhibition match khel turin ka lokal tawh a, Mizo mipuite hian football in ngaina a nuam ka ti takzet a ni,” tiin Aizawl chu hmun nuam leh mawi tak nia a hriat thu a sawi.
Kum 31 a upa Gouramangi hi Indian footballer langsar ber pawl niin club level-a nomawi chawi theih chu a chawi kim thawkhat a, 2008-09 khan I-League Best Defender atan thlan niin 2010 khan AIFF Player of the Year lawmman a lo dawng tawh bawk. “Jeje pawh hi ka thian tha tak a ni a, Mizoram ka rawn thlen pawh khan ‘Welcome to Mizoram’ tiin message min rawn thawn nghe nghe a ni,” tiin Indian footballer zinga vaibelchhe khat hlawh hmasa ber chuan a sawi.
“Kum 10 liam ta kha chuan Mizoram leh Manipur hian football club mumal kan nei tlem hle a, ram pum huap a kan footballer lar te inkhel TV-a en leh chanchinbu a chhiar bak kha tih theih vak kan nei lo. Tunah erawh chuan Aizawl FC emaw NEROCA pawh nise mipuite’n hmun leh hmunah ngei inkhel kan en thei tawh a, engkim hi Northeast tan a ni. Hetiang history pawimawh siamnaa ka tel ve thei hi ka lawm hle,” tiin Northeast football in hma a sawn nasat thu a sawi.
Gouramangi hi player inngaitlawm leh kawm nuam tak a ni a, “Manipur-ah Renedy Singh nen hian an khiakhin fo che a, enge I ngaihdan?” ti a kan zawhna chu “Renedy hi ka senior a ni a, kan chhungkaw thian (family friend) an ni bawk. Min khaikhin lo se chu ka duh a, mahse min lo khaikhin a nih pawhin ka tan chuan chawimawina ropui tak a ni,” tiin amah aia senior a zah thiamin a tawng fimkhur hle.
India tan a vawi 71 inlan tawh Mangi hian TFA atanga a zir chhuah tirhin Mohun Bagan zawm zawk mahse a cham rei lo a, kum 2004 atangin professional football khel tanin a khelh mekna NEROCA bakah Dempo SC, Mahindra United, Sporting Goa, Churchill Brothers, United SC, Rangdajied United, Chennaiyin FC, Bharat FC, FC Pune City leh DSK Shivajians tan a khel tawh. Football chawlhsan mai a la tum loh thu a sawi a, Manipur ah 7-a-side artificial ground siam a naupangte football zirtir a tum thu a sawi bawk.
“Mizo te hian footballer tha in ngah em em a, a tha ber sawi tur an vang hle. Mahse pakhat sawi loh theih loh ka nei, chu chu Malsawma kha a ni. TFA-ah kan awmdun a, kan inkawmngeih hle thin. Chhan hrang hrang vanga a football zinkawng tawi ta lutuk kha pawi ka ti hle a ni,” tiin Mizo footballer hmabak nei eng tak tak an awm thu a sawi bawk.
+ There are no comments
Add yours