AIZAWL FC IN THIH HUAMA CHAWNGHEI AN TUM

India ram domestic football league sang ber ni mek Hero I-League champion Aizawl FC chuan India ram league sang bera an awm chhunzawm theih nan India rama football thuneitu sang ber AIFF hnenah lehkha an theh lut.
.
He an lehkha thehluh hian awmzia a neih loh chuan nasa zawkin an nawr zel dawn a, thih thlenga chawnghei pawh an huam dawn niin UK Chanchinbu lar Guardian chuan an tarlang ta kuau mai!
.
Season thar atang hian India rama football league kalphung tihdanglam a ni dawn a, Indian Super League chu league sang ber niin tuna a sang ber ni mek I-League hi second division niin League One tih a ni dawn a, I-League second division hi third divison league niin League Two tih a ni tawh ang.
.
Second Division (I-League ni mek) atang hian ISL-ah kaisan mai mai a theih dawn lohva, kum 7 chhung chu ISL club te pawh division hniamah an tla thei dawn lo!
.
Tuna I-League club zinga 2- Mohun Bagan leh East Bengal te hi ISL-ah special entry pein ISL an khelh avanga an thehluh tur franchise fee 15 crore chu awltir tum a ni a, anni bakah hian Bengaluru FC chu ISL-a chho tura sawi lan a ni bawk (thu tak a nih ngei pawh a rinawm).
.
League sang 2 te chhunfin ni dawn mah se, official a league sang ber ni mek a mi ram pakhat football league sang bera tel chhunzawm tir loh chu thil nihphung a ni lo va hriain Aizawl FC hian he dilna hi an thehlut ta a ni.
.
Aizawl FC chuan, “AIFF-a lehkha thehluh hi a hlawhtling lo a nih chuan central sports minister, prime minister of India leh Asian Football Association (AFC) hnenah thu thlen chhunzawm a ni ang.

“Hemi hnu pawha a la hlawhchham cheu a nih chuan club chuan duhthlan tur dang nei chuang hek dawn lo le; khawvel huapa lungawi lohna lantirin AFC/Fifa office bulah sitting demonstration neiin a tawp khawkah AIFF office bul hnaiah a huhovin thih huam a chaw nghei a ni ang,” tiin thuchhuah an siam!
.
Guardian tarlan zel dawnin Thawhtanni khan Pu Robert Romawia chuan AIFF in ISL an kheltir ngei a beisei thu sawiin, “Engtin nge league sang bera champion lai division hniamah kan tlak rikngawt ang! A thleng a nih ngai chuan kan pawm thei ngai lo vang. Asia huapa intihsiaknaah kan tel dawn. India champion hi khawmualpui pakhat huap inelna sanga telin an ram league sang bera an awm phal ni leh si lo se la, a awm ang lo viau ang,” a ti.
.
Indian Express in AIFF senior official hnen atanga an hriat danin hemi chungchang hi tun Inrinni (May 6, 2017) ngaihtuah a ni ang.