#ZoFooty

BALOTELLI: THE UNTOLD STORY
(Chapter: XIV)

Thla engemawzat a liamhnu chuan Mario pawhin Lumezzane youth team a zawm ve ta. Mario hi a awm awl hman meuh lo a, Pavoniana Football teamah hunrei vak lo khelin, an A Team ah ball boy a ni ṭhin bawk.

Franco Balotelli te nupa chuan Mario hi Mompiano-ah a hlim tih an hria a, FC Lumezzane nen an indawr lai pawhin an inremna ah chuan an fapa in an beisei a phak lo a nih chuan Mompiano ah a kir leh thei ang tiin an inrem a ni.

Kum khat hnuah chuan Lumezzane u-13 leh Mario khelhna hlui Pavoniana u-13 team ten Brescia Today Trophy an inchuh a, he inelna hi Brescia Oggi Trophy tiin sawi a ni ṭhin bawk. He khua leh a chhehvel a Amateur team tha ber an zawnna a ni.

Hetih hunlai hian Mario hi kum sawmpahnih a la tling lo deuh a. An khingpui leh a teammate te chu amah aia upa ṭhiau an ni.

Stadium an han lut tur chu announcer in player a ko chhuak den den a, Mario hun a thlen chuan, “Number 9, Mario Barwuah,” tiin ring takin a puang a, mahse Mario chu a che eih lo.

Mompiano aṭanga a hrawn tawh an coach Valenti chuan, “Mario, eng thil nge i tih? Kal ta che,” a lo ti thuai a.
Mario erawhin, “Ka hming chu Mario Balotelli a ni, Barwuah ni lovin,” a ti deuh hmuk mai.
An coach chuan, “Kal phawt teh, nakinah kan siam ṭha dawn a nia,” a ti a.
Mario chu a kal duh hauh lo mai. “Tunah ka duh, ka hming chu Mario Balotelli a ni,” tiin.

Valenti chuan official thutna lam panin a han siam ṭhat tir ta nge nge a. A hnuah chuan an announcer pawhin “Number 9, Mario Balotelli,” tiin a rawn puang ta dum dum mai. Mario chuan an coach Valenti hnenah lawmthu sawiin phur takin khelmual a pan ve thei ta.

Mario hi a chhungte- Franco leh Silvia bakah a unaute John, Conrad leh Cristina ten an lo tawiawm ve ṭhap mai a. Announcer in ‘Mario Barwuah’ hming a lam lai a rawn chhuak tur a awm lo chu mak an lo ti ve hle. Mahse ‘Mario Balotelli’ tiin a hming an puan tak hnuah a rawn chhuah chuan thil awmzia an hrethiam nghal. An chhungkaw chunga Mario rilru put dan an hria a, mahse Stadium a thil thlen dan chuan a ṭhawng ve hle.

Brescia Oggi Trophy hi henglai khaw chhehvel a rawlthar te tan chuan an Champions League a ni ber a, an ngaihlu vet vet ṭhin hle. An khingpui Pavoniana hi team ṭha tak leh he inelna a champion tur a mi tam tak rinkai zawk an ni a. Tin, Mario ang tho a African, Adama Fofana an kawl ve a, Ivory Coast atanga he hmun pan hi a ni a, striker ṭha tak a ni.

Adama Fofana leh Mario hi Serie C team Pavoniana tan hian an khel dun ve hman a, thian inkawmngeih tak an ni nghe nghe.

Brescia Oggi Trophy inchuhna match hmuhnawm takah chuan Mario leh Fofana ten goal an inkhung chhawk zak zak mai. Pavoniana striker Fofana hian goal hnih khungin a khel ṭha hle a. Mahse a ṭhianpa Mario chuan hattrick a siam thung a, Lumezzane chu 3-2 a chakpuiin Trophy an chawi.

Huntawp hamrik a rik velah Lumezzane player te chu champion lawmin an sapatal nasa hle a, mahse Mario erawhin a ṭhianpa Fofana a lo hnem thung.

Fofana chuan he thil thleng chungchang hi tunhnu ah sawiin, “Kha final match a min tawrhpui zia lan tir tura Mario rawn kal kha ka hre reng ṭhin ang. Ka rilru a hnual takzet a, goal hnih ka khung a, trophy chawi kha ka chak khawp mai. An han chawi ta mai kha ka hrethiam lo em em a, mahse ka ngaituah let hi chuan an phu ka ti e. “

“Rilru na tak a ka awmlaiin Mario chu ka bulah rawn kalin min rawn hnem a, ka khelh ṭhat thu leh kan chak zo ta lo chu pawi a tih thu min rawn hrilh. Ka ngaihtuahawm loh thu ka hrilh hnuin a teammate te kiangah champion lawm turin min kalsan ve ta chauh a ni. Kha thil thleng kha ka theihnghilh tawh ngai lo ang,” a ti a ni.

Mario in a teammate te bulah an champion a lawm laiin Lumezzane u-13 captain Andrea Santin chuan a lo koki chhuan a, khi full thak chungin trophy a chawi ve ta.