Brazil hian ram tana jersey no.10 ha players ropui tak tak an nei nual a, a tha zual bik 10 han tarlang dawn teh ang.
10. Juninho Paulista
Free-kick pet thiam hmingthang Juninho hi Sao Paulo atanga chawr chhuak niin a pa lian lo na a, ball erawh a thiam hle thung. Ram tan kum 8 chhung zet a in lan a, free-kick sawi apianga a hming dai tawh ngailo tur Juninho hi Brazil jersey no.10 ha tawh zingah sawi hmaih chi a ni awm lo e.
9. Rai
90’s chho vel kha chuan Rai anga forward tha hi chu an la tam lem lo khawp ang. Kum 1992 Intercontinental Cup ah a hming rawn chher chho tannin hei hian Europe a hruai thleng hial kan ti thei awm e. France club PSG ah lut in a inpui ang maia ngaih theih turin a hming a chher chho a a ni.
Rai hi Brazil tan game 49 in lan in goal 17 a khung a, kum 1994 World Cup champion team ah pawh khan a tel nghe nghe.
8. Jair
Jair hmingpum chu Jair Rosa Pinto a ni a, South American Championship 1949 khan top scorer niin tournament chhung hian goal 9 lai a thun a, South American Championship tournament vawi 1 a goal thun hnem ber ni a, a ni lo hi midang pahnih an awm ve bawk a ni.
Heti taka Jair a chet that takah chuan fans te pawh an phur in amah ah rinna an neih nasat phah hle a, a kum leh 1950 World Cup Brazil a an nghah tur pawh an champion leh ngei an ring a mahse final ah Uruguay an hneh ta lo a, hemi avang hian Jair pawh a nghawng hle a, a football career pawh a chhiat chhoh phah ta reng a ni.
7. Rivellino
Pele khan ‘Football is a beautiful game’ a lo ti thin a, a ti chiangtu ber te zing a mi chu Rivellino hi a ni kan ti thei awm e. Brazil 1970 star hi “flip-flap” hmuchhuaktu chu a ni hauh lo a mahse flip-flap ti changtlungtu ber a ni kan ti thei ang. Mexico lamah club tan jersey no.11 ha thin mahse ram tan erawh noi.10 a ha thung a ni.
6. Kaka
Kaka hi chu akn hre fur hlawm awm e. kum2002 World Cup a Brazil squad ah khan telin Europe ah a hming a chher chho tan a, players tha a nih zia AC Milan ah te lan tirin 2007 Ballon d’or pawh a dawng hial a nih kha. Players tha chungchuang a nih zia chu sawi nawn a ngailo anga, Brazil jersey no.10 ha tawh zawng a ropui ber pawl a chhal ngam a ni hial awm e.
5. Neymar
PSG Brazilian player Neymar hi football a chawlhsan meuh chuan Brazil tana goal thun hnem ber a nih ngei a rinawm. Tunah hian ram tan vawi 101 in lan tawh in goal 61 a thun tawh a, Ronaldo(62) leh Pele(77) te chiah a pha lo a ni.
4. Rivaldo
Defender te tana hnawksak Brazilian winger cross thiam hmingthang hi ram tana a in lan hmasak ber chu 1993 khan a ni a, Brazil chuan friendly match ah Mexico chu sikhat fai a hneh in goal aw chhun hi Rivaldo thun a ni. kum 1999 Copa America ah khan a khel tha hle a, Brazil champion puiin Ronaldo nen goal 5 ve ve thun in Golden boot an in tawm a, hemi kum vek hian Ballon d’or a dawng nghe nghe a ni.
3. Ronaldinho
A ball thiam zia chu sawi lan kher ngai lo in kan hre vek awm e. Football a thiam zia piah lamah a nui hmel nelawm tak mai hi a hming rik ruala mitthla a cham reng tawh tur a ni. 2002 World Cup a Brazil in a vawi 5 na atana an champion na kawngah players tangkai tak niin David Seaman laka free-kick mawi tak a chhuih luh te pawh khawvel in a theihnghilh tawh ngailo ang.
2. Zico
“The White Pele’ ti a a hming lem an vuah sak hial Zico hi Brazil mipuite hian a ni aia ngainat players an nei tam awm lo ve. Zico hian a ram tan trophy hlawh chhuak lo mahse a telna Brazil 1982 team te kha team ropui berah an la chhal reng a ni. Zico hi a goal thun theih avangte leh field chhunga a chetla vel vang hian vawiin ni thleng in hriatreng a la hlawh a ni.
1. Pele
A hming lam ringawt pawh hian football kan tin zawn a ni tih awlsam takin kan hre thei nghal zel awm e. Kum 1958 World Cup khan tleirawl te niin Brazil in an World Cup trophy hmasa ber an hlawhchhuahna kawng a players tangkai ber a ni pha hial a ni. Brazil ram tana jersey no.10 ha tawh phawt chu tu pawh nise Pele nen an khaikhin nghal a, ram tan no.10 hak hi a phu ve reng em tih hi Brazil mipuite zawhna hmasa ber a ni zel tawh a ni. Pele hian ram tan vawi 92 in lan in goal 77 lai a thun a, Brazil tana goal khung hnem ber nihna a la chelh mek. Brazil mipuite chuan Brazilian players piang tawh zawng a ropui berah an ngai hmiah mai a ni.
