Zanin dar 12:30 hian Anfield-ah Liverpool leh AC Milan te an inkhel dawn a, Champions League group match hmasa ber hian Istanbul min ngaihtuahlet tir hlawm ngei ang.
Nimin lawka thil thleng emaw kan tih kha, kum 16 liam ta a lo ni reng tawh. Chumi a nih avang chuan hre lo pawh a awm theih tawh ngei ang le.
Istanbul han tih chuan 2004-05 UEFA Champions League final kha a ni a. May 25, 2005-a Liverpool leh AC Milan te inkhel kha ‘football inkhel tawha ropui ber’ ang hiala sawi an awm pawhin dem theih a ni lo – a ropui em a ni.
STEVEN GERRARD
Liverpool captain Steven Gerrard pawh final khel turin a hehhawlh ve hle. English midfielder ṭha mi chuan a hnuaia tarlan ang hian final boruak a sawi.
“Champions League final avangin zan thum vel chu ka mumal thei tawh lo a, Istanbul-a kan inkhel tur chu ka nghakhlel tawh takzet.
“Khelmual ka luh hauh hmain ṭum li vel chu ka suangtuahnaah final chu ka khel tawh a, ka phurna chu a nasa em em a, chu chuan minti chau tel bawk”.
CARLO ANCELOTTI
Liverpool hi team ṭha tak ni mah se rinkai zawk erawh AC Milan an ni a, Italian club hian star player rual kawlin team enkawltu chu Carlo Ancelotti a ni.
Tun season-a Real Madrid enkawltu Ancelotti hi a inkhelh hunlai pawhin player ṭha a ni ve hrim hrim. Player a nih laiin European Cup vawi hnih a chawi a, 90 World Cup-a Italy team-ah pawh khan rinrawl a ni pha.
Liverpool an hmachhawn ṭumah pawh hian tawnhriat ṭha tak a nei tawh a, kum 2003 khan Milan hi Champions League-ah a champion pui tawh.
Inkhelh hmain Ancelotti chuan, “Season ṭan hmain tum kan nei a, kan tum chu Instanbul thlen a ni. Inhmuh ang hian kan rawn thleng e. Kum hnih liam ta khan kan nomawi inchuh tur hi kan chawi tawh a, hun nuam tak a ni. Player ṭhenkhat chuan nomawi hi an mutpui hial,” tiin nomawi hlut zia a sawi.
Press conference neihna hmunah pawh journalist-in ṭhutna an chang vek lo a, a ding tawk an awm.
STAR RUAL CHU
Milan team sheet en chuan Italian club hian panna lai reng an nei lo, keeper Dida leh striker Andriy Shevchenko inkarah chuan star rual hming a tlar ṭhup.
Defence-ah Cafu, Jaap Stam, Alessandro Nesta leh captain Paolo Maldini te an awm a, mimal tin hian chanchin ngaihnawm tak an nei vek.
Midfield-ah lah Andrea Pirlo, Gennaro Gattuso, Clarence Seedorf leh Kaka te an awm a, Shevchenko kawppui pawh Hernán Crespo a ni.
Bench-ah pawh Alessandro Costacurta, Rui Costa leh Jon Dahl Tomasson te kha an ni a, Indian thisen kai Vikash Dhorasoo pawh bench-ah a hian a awm ve nghe nghe.
LIVERPOOL VE THUNG
Kum 21 hnuah Liverpool-in Europe-a inelna sang berah nomawi an beisei a, an hmachhuan chu club legend Steven Gerrard leh Jamie Carragher te an ni.
English club tan hian Jerzy Dudek, Steve Finnan, Carragher, Sami Hyypiä, Djimi Traoré, Xabi Alonso, Luis García, Gerrard, John Arne Riise, Harry Kewell leh Milan Baros ten bul an ṭan.
Reds tana bul ṭantute hi player ṭha ve tak chu ni ve bawk mah se Italian club nena khaikhina ral chuan chhuang taka an hming lam rik tur an tlem pharh.
Mahse maw, khawi hmunah pawh ni se Liverpool aia ṭantute nei ṭha zawk an awm a nih pawhin an tam kher lo ang. Instanbul-ah pawh hian Reds ṭantute hi ṭum dang ang bawkin ‘No. 1’ tiha sawi theih an ni a, an team-te hi mala awm tir an tum lo.
MILAN AN LAM
Inkhel an ṭan chauh a, Pirlo freekick pet chu Maldini-a’n a volley a goal. Kum 36 mi defender hian goal khung turin second 50 chauh a mamawh a, Italian club ṭantute thawm a ring takzet.
Reds buaina belhchhah turin Harry Kewell chu ṭhal hliam vangin minute 23-na lekah thlak a ngai. Mahse, Liverpool hian si phurh sut an tumin an nawr ngam. Garcia chuan box chhungah a lalut a, Nesta kutah a perah a ngai.
Referee erawhin penalty turah ngai lo a, Milan-in an vaw let ta thung. Pirlo-a’n Kaka a pe a, Brazilian star hian Schevchenko pe lehin Milan striker cross chu Crespo-a’n minute 39-naah a khung.
Commentator pawhin Liverpool tan chuan thilmak a ngai tawh ang tiin a sawi hial a, Milan phur a la reh lo. Halfway line bul aṭangin Kaka chuan minute 44-naah through ball ṭha bik a pe lut a, Crespo-a’n goal-ah a chantir.
First half-ah Milan-in goal thum an khung tak avangin chak turah a chiangah a ngaih theih a, Maldini, Nesta, Stam leh Cafu te awmna tlarhnunga goal thum khung chu beisei ngam chi a ni lo.
YNWA
Liverpool-in goal thum an chhuah a, player-te’n zak takin khelmual an chhuahsan. Mahse, Reds ṭantute an tlawm ve duh lo.
Goal thum ngawt chhuah tawh an player-te hi an la au phur a, Liverpool player-te thlirna pawh a thlak. Reds boss Rafael Benitez pawhin danglamna a thlen theih mial takin tiin right back Steve Finnan aiah midfielder Dietmar Hamann a luhtir.
CAPTAIN FANTASTIC
Second half an ṭan a, minute 54-naah chuan Alonso chuan mual vei lama awm Riise hnenah ball a pe. Norweigian winger cross luh chu Gerrard-a’n a tauh goal.
Reds tana goal khungtu Baros emaw Smicer emaw a ni lo, Gerrard a nih tlat avangin a nghawng pawh a lian. Captain fantastic chuan tlan let pahin a kut chu nasa takin a vai a, mipui a chawk phur a, a tlan let chak danah goal dang a duhzia a lang bawk.
Liverpool ṭantuten awm ngaihna an hre lo a, goal hnih lawih la mamawh mah se chak an inbeisei ngam. Bengngawng te hriat phakin thawm an chhuah a, Milan player tawnhriat ngah tak takte pawh an talbuai zo ta.
Minute 56-naah Smicer chuan box pawn aṭangin mawi zetin a pet goal a, 3-2 a nih tak avangin inkhel a nung ta hle.
Captain Gerrard bawk a rawn lang a, ṭha zetin penalty a hlawh chhuak. Alonso rawn pen chhuakin keeper Dida-a’n dan sak mah se a per chu goal-ah a chantir ta tho. Minute 60-naah Liverpool-in an siphurh an sut zo der a, rinkai zawk an awm ta lo, 3-3 a ni tawh tlat.
CHHANDAMTU DUDEK
Minute 90 a khel zo a, extra time an khel zui. Jerzy Dudek chuan Schevchenko ball tauh chu ṭha zetin a dan sak a, a per chu Ukrainian striker bawkin goal-ah pet mah se Liverpool keeper hian a dang leh tho.
Extra time-ah goal a luh belh lo. Penalty pet a ngai ta a, Dudek chu goal-ah a lam a, Serginho-a’n a pet over. Hamann erawhin a pet goal.
Penalty pet thiam Pirlo pawh Dudek-a hmaah a talbuai a, Reds keeper hian a dan sak. Djibril Cissé-a’n hla tak aṭanga rawn tlanin chiang zetina pet goal.
Liverpool dinhmun a ṭha zawk a, 2-0 a ni. Milan tan Tomasson-a’n a rawn khung. Reds tana pettu Risse pet chu Dida-a’n a dan sak a, Kaka-a’n a pet goal zui avangin 2-2 a ni.
Reds erawhin pakhatin an la pet tlem zawk a, Smicer rawn pen chhuakin a rawn pet goal a, pet zat inangah English club hi 3-2 in hma an hruai.
Milan tan striker chhuanvawr Schevenchko a rawn pen chhuak a, Dudek-a’n a dan sak. LIVERPOOL CHU EUROPEAN CHAMPION AN NI TA.
Thil thlen dan hi thuin kan sawifiah thiam tawh lo. Comment lamah han sawi chhunzawm ula, kan lo chhiar ve thung ang e.
