Marcello Lippi a chawl ta

Football khawvela coach ropui ber pawl Marcello Lippi chuan coaching hna a bansan thu a sawi.

“Coaching hi chu ka bansan fel hmak e. Tunah chuan a tawk ta e. Hna dangah ka tangkai zawk maithei, mahse kumthar lo thleng phawt sela,” tiin kum 72 a upa Italian coach chuan a chawlh thu a puang.

Lippi hi professional footballer hlui niin Sampdoria tan a vanglai hun a hmang a, a hming chherna erawh coaching lamah a ni thung. Club tenau zawk atanga bultanin Napoli (1993-94), Juventus (1994-99, 2001-04), Inter Milan (1999-00), Italy (2004-06, 2008-10), Guangzhou Evergrande (2012-14) leh China (2016-19) te hi a enkawl langsar zual an ni. Nikum November thlaa China manager atanga a ban hnuin hna nei loin a awm reng a, chawlh a thlang ta a ni.

Ram leh club hrang hrang a enkawl chhungin nomawi tam tak a chawi a, heng zingah hian FIFA World Cup (2006), Serie A panga (94/95, 96/97, 97/98, 01/02. 02/03), UEFA Champions League (95/96), UEFA Super Cup (’96), Intercontinental Cup (’96), AFC Champions League (2013) leh Chinese Super League te a tel.

Mimal chawimawina a dawn zingah Serie A Coach of the Year (3), UEFA Club Coach of the Year, IFFHS World’s Best Club Coach (2), European Football Coach of the Season (2), IFFHS World’s Best National Coach, World Soccer World Magazine of the Year te a tel. Hei bakah hian kum 2011 khan Italian Football Hall of Fame – ah lakluh niin ESPN leh France Football – in Greatest Manager of All Time an thlanaah a sang pawlah a lang pha bawk.