Kum 2013 – a khawvela footballer man to ber khan Champions League nomawi pali leh La Liga nomawi pahnih chawi pui mahse ‘mamawh’ a ni tawh lo a, a club hlui Tottenham – ah ‘loan’ a kaltir a ni.
Kum 31 a upa Gareth Bale hi Real Madrid – ah hian a hlawhchham em ni ? Chhui zau ang aw..
Man leh mual
Real Madrid – in Gareth Bale an lakluh lai hian kum 24 a upa a ni a, Spurs tan game 203 khelin goal 55 a thun hman. Club lamah mimal chawimawina hrang hrang a dawn bakah Premier League – a mimal chawimawina sang PFA Players’ Player of the Year, PFA Young Player of the Year, FWA Footballer of the Year leh Premier League Player of the Season te a dawng tawh a, 2011 – 2013 chhung khan a zawnin tum thum ngawt PFA Team of the Year – ah a tel phak bakah 2011 leh 2013 – ah te hian UEFA Team of the Year – ah a lang pha bawk.
Kum 2010 – a San Siro – a kum 21 leka upa Gareth Bale – a’n khatih laia khawvela right-back tha ber tih ngam Maicon tlanpela hattrick a siam dan te kha theihnghilh chi a ni lo a, Bale hi player theihna sang tak nei a ni tih phat rual a ni lo. A man chungchangah hian inhnialna a awm fo a, amaherawhchu pound maktaduai 85.1 (€100.8 million) hi a rintlak bera ngaih a ni. Real Madrid te ang club hausa leh nomawi chawi duh reng tan chuan kum 24 mi, England leh Europe khawmualpui huapa chawimawina lo dawng fo tawh leina atan chuan a man hi a to lemin a lang lo a, tunhnuah Real Madrid hi an inchhir a rinawm loh, vawiin thlengin Eden Hazard nen Real Madrid player man to ber an la ni reng.
Mimal record leh nomawi
Bale hian La Liga bikah Real Madrid tan game 171 khelin goal 80 a thun bakah assist vawi 40 a nei a, goal 120 zetah a inrawlh tihna a ni. British mi zinga La Liga – a goal thun hnem ber a ni mek. Santiago Bernabeu – a kum 7 a khelh chhungin nomawi 13 zet a chawi hman a, chung te chu – UEFA Champions League (4), FIFA Club World Cup (3), La Liga (2), UEFA Super Cup (2), Spanish Super Cup (1) leh Copa del Rey (1) te an ni.
Spain – ah hian England ang em in mimal chawimawina a dawng tam lo a, kum 2016 khan UEFA Best Player in Europe Award – ah pathumna a ni a, FIFA Club World Cup Golden Ball (2018) a dawn bakah Champions League Squad of the Season (2015/16) – ah a lang bawk.
Vanduaina leh goal ropui
Bale hian Real Madrid tana a game hmasa berah Villarreal lakah goal a thun nghal a, a season hmasa berah hian game 44 khelin goal 22 a thun. Madrid – a zawm hnu thla hnihna lekah November 2013 khan Real Valladolid an hnehna inkhelah Madrid tana a hattrick hmasa ber a siam bawk. Statistics en mai chuan Bale – a record hi a chhe lem lo a, amaherawhchu inhliam vanga inlan theih loh leh minute 90 khelh theih loh a ngah hle.
Kum 2016/17 season phei kha chuan hliamin a tibuai nasa hle a, inelna hrang hrangah vawi 27 chauh inlanin goal 9 a thun. Fans te’n vawi tam tak an ‘boo’ a, Zinedine Zidane – a’n Real Madrid a enkawl chinah phei chuan Bale hi a pawn lang tial tial a, player tha dang Isco leh Marco Asensio te an lo awm ve bawk nen, Zidane leh Bale hi khawvel hriatah an inkhak fo a nih kha. Mi tam tak chuan Zidane – a’n Bale a enkawl dan hi an dem a, tunhnaiah erawh Zidane hian Bale nen an inkarah harsatna engmah a neih loh thu a sawi ve thung.
Hetiang hi a dinhmun ni mahse Bale hian Madrid tana a khelh chhungin football khawvelin a hriat reng tawh tur goal ropui thun a nei nual. 2014 Copa del Rey final – a Barcelona an hneh tumin Barca defender Marc Bartra chu halfway line pul atangin tlanpelin keeper Jose Manuel Pinto dan theih loh ‘solo goal’ ropui a thun te, 2014 Champions League final – a Atletico Madrid lama extra – time a goal a thun te leh 2018 Champions League final – a Liverpool lama a ‘overhead kick’ goal ropui thun kha football khawvelin a hre reng tawh ang. Hemi tum hian bench atangin minute 61-naah lut chauh mahse minute 64 – na leh 83-naah te goal thunin Madrid hi a chak pui a, man of the match a ni chiang hle.
Bale hian Madrid – ah kum 2022 thleng contract a la nei a, a agent Jonathan Barnett erawh Tottenham – ah a cham hlen hreh a rin loh thu a sawi.
