French Ligue 1 – a pawisa ngah PSG aia club lian lem lo Lille champion theih dan chanchin hi a ngaihnawm a, a bik takin an manager Christophe Galtier hian fak a phu hle.
Thawnthu hlui
Lille hi Ligue 1 – ah hian vawi 4 an champion na a ni ta a, 1945/46, 1953/54, 2010/11 leh tun season te kha a ni a, a chhang a khat viau. Tun hnai kum 9 chhungin Ligue 1 nomawi hi Monaco (2016/17) leh Lille tih loh hi chu PSG hian an hui fai vek a ni. Chu ti khawpa roreltu an nih laiin Galtier leh a hote hian an dang chat thei tlat.
Lille squad hlut zawng hi pound maktaduai 126 vel a chhut a ni a, an elpui ber PSG squad hlut zawng hi pound maktaduai 551 anga ngaih a ni thung. Sum tam taka club dang atanga player lei thin PSG academy chhuak player pali – goalkeeper Mike Maignan, midfielder Boubakary Soumare leh forward pahnih Jonathan Ikone leh Timothy Weah te hi PSG ‘duh loh’ an ni a, mahse Galtier – a tan chuan a player pawimawh ber ber an ni tlat.
Kum 54 a upa Galtier hian kum 2010-2017 chhung khan Ligue 1 club Saint-Étienne a lo enkawl tawh a, club vantlang pawl tak nihpuiin French League Cup nomawi te pawh a chawipui hman. Kum 2017 December thla khan Ligue 1 atanga relegate thei dinhmuna ding, hetih laia table – a 18-na ni mek Lille hi a enkawl tan a, manager lar Marcelo Bielsa a thlak.
Galtier a hnuaiah Lille hian hma sawn chhoin an game hnuhnung paliah vawi thum chakin point 1 lekin an relegate lo hlauh ! 2018/19 season – a nih meuh chuan Lille hi league – ah pahnihna nihpuiin Champions League a khelh pui phak hial a, Ligue 1 manager of the year a dawn phah.
Mi danglam bik
Galtier a danglamna hi sawi tur a tam lo hle a, a langsar tak erawh chu player naran tak anga ngaih te pawh hi an thatna tur ang berin a hmang chhuak thin. Nikum nipui laia kum 35 a upa striker Burak Yilmaz a lalut te kha mak tih a hlawh a, mahse he Turkish striker hian league – ah goal 16 thun zuiin an champion theih nan a thawhhlawk hle. Ani bakah hian player talent nei tha, zuih ral titih tawh Renato Sanches chu kum 2019 nipui lai khan an club player man to ber ni turin zu lalut ngam a, mahse a tifuh ! Rennes atanga a lakluh, midfield – a an innghahna ni chho ta Benjamin André hi sawi hmaih a thiang lo bawk.
Captain atan player naupang leh fit tha zawk hmang loin kum 37 a upa tawnhriat ngah Jose Fonte a hmang lui tlat a, a kawppui turin season tan dawn khan kum 21 leka upa Sven Botman a lalut a, a ti sual lo. Nikum nipui laia an club player of the year ni lai Victor Osimhen a hralh kha mi tam tak chuan a tihsual an ring a, mahse a hralhna pawisa euro maktaduai 70 zet, an club record ni bawk kha thiam takin a hmang a, Osimhen a hmun ruak luah turin Canadian forward Jonathan David a lalut a, David hian league – ah goal 13 a thun.
Tun season khan Galtier hian player 21 a chhawr a, Ligue 1 club zinga player chhawr tlem ber a ni. Pierre-Emerick Aubameyang – a chher chhuaktu manager hian Lille – ah a cham zui dawn em hriat a ni lo a, season tharah hian club dang a enkawl a nih pawhin mak lo ti suh – a danglam tlat !
