BALOTELLI: THE UNTOLD STORY
(Chapter: XVI)

#ZoFooty

BALOTELLI: THE UNTOLD STORY
(Chapter: XVI)

Kum 2006 nipui lai a ni a, Mario pawhin kum 16 a hnaih ve ta. A unaute pahnih – John leh Conrad Balotelli te nen chuan an inah chhungkaw ṭhutkhawm an nei a.

John-a chuan Mario hnenah, “I hma hun tur hi kan sawi ho deuh chu a ngai a ni,” a ti a.
Mario chuan, “Inter-ah chuan kan sign dawn tihna emni?” tiin a lo zawt a.
Conrad-a’n, “Ni lo e, tunah chuan ni rih lo. I phu tak ang lawman an pe thei dawn lo che,” a ti a.

Mario chuan a unaute te chet lak dan chu a hrethiam lo hle a, an phur ang reng viau lawi si.
John-a chuan, “Insiam i ngai a nia. Thlawhtheihna kan nan hman a ngai,” a ti teh thut mai a.
Mario chuan hrilhhai hmel zetin, “Khawnge kan kal dawn?” a ti heu mai a.
A unaute chuan, “Barcelona ah trial kan nei dawn,” an ti ta a.
Ani chuan, “Awihawm loh!” a lo tihsak a.
Conrad chuan, “I chanchin hi an lo hria a, hmuh ngei che an duh. Barca ah aw ka nau. Barca in an hmu duh che!” a ti a.

Mario chuan a unaute chu a kuah a, an ngaihsak ṭhin em avangin a hnuk te a ulh ve lek lek.
Milan, Italy atangin Barcelona, Spain lamtluang zawh turin an thlawk chhuak ta. Darkar hnih vel hun an hmang a. Thlawhtheihnaah Mario hi a vawi khat chhuanna a ni a, a zam ru ve hle.

FC Barcelona chuan Mario tan hian Barca B Cadet team bulah match thum khel turin an lo ruahman a, Barca academy, La Masia a awm mek zingah ṭhian thar pawh a chhar thuai mai. A hming chu Thiago Alcantara a ni a, ani hi Football tuimite chuan kan hmelhriat viauin a rinawm.

Thiago hian Mario hi lo kawm tlangnel a, an inkawmngeih thuai mai. Thiago hi Brazilian ni mahse Italy a piang ve tho a ni a, Spain tan a khel zui thung.

Mario hnenah chuan, “Italy a piang ve tho ka nia. Ka pa hi Italy ah a inkhel ṭhin a, Spain ah hian kan insawn a, a hnuah Brazil-ah kan let leh a ni,” tiin an chanchin te a hrilh a.
Thiago pa hi Mazinho a ni a, kum 1994 World Cup winner Brazil team-ah khan a tel ve nghe nghe. Tin, a nau Rafael Alcantara, Rafinha ti a kan hriat mai pawh La Masia ah hian a awm ve a, Barcelona senior team tan engtikniah emaw khelh phak ngei tumin an inbuatsaih mek a ni.

Mario pawhin he hmun hi a ngaina khawp mai a. Trial an neih chhung hian John leh Conrad te chuan khelmual sir aṭangin an lo ṭawiawm ve reng ṭhin a. Barca hi Mario awmna atan an ring a. An beisei ang ngeiin Mario pawh khelmual lamah a che ṭha ṭhin hle.

Barcelona defender hlui leh an Youth Team Head Coach Jose Ramon Alexanko chuan Mario hi a duh ve hle a, a notebook-ah Mario hian game ṭha tak khelin goal nga(5) a thun thu te pawh a ziak a. Alexanko hian Mario hi fak viau mahse a nungchang hi buaipui tham a nih theih thu a sawi tel bawk.

FC Barcelona president Joan Laporta leh an head coach Frank Rijkaard te pawhin Mario hi ṭha an ti ve hle a, mahse buaina dang a awm tlat mai. Mario hian khawi khua leh tui (citizenship) nihna mah a la nei lo a, chuvangin board lamin inkhel turin an pawm thei dawn lo.

Mario hi Palermo, Italy a piang ni mahse amah hringtu, a nu leh pa hi Ghana aṭanga Italy a pem an ni a, Italy khua leh tui nihna an la nei lo a ni. Mario hi hetihlai hian kum 15 chauh ala ni a, citizenship nei tur chuan kum 18 a tlin hun a nghah a ngai.

FC Barcelona head coach Frank Rijkaard leh Mario manager Pantelo Corvino te chu an indawr zui tho ni a sawi a ni a, mahse an beisei anga indawrna kalpui a nih loh avangin Milan lamah an haw ta zawk a ni.

Barcelona aṭanga Milan lam pana an haw laiin Mario chuan a manager in citizenship chungchang a hrilh chu a ngaituahzui neuh neuh a, a u te bulah chuan, “Ka nihna hi ka hria, Italian ka ni,” tiin a sawi a.
John leh Conrad te chuan, “Khua leh tui nihna i neih hunah chuan tuman an sawisel thei lo ang che. Kum 18 i tlin velah kan ching fel vat dawn a nia,” an ti a.

Mario pawh a thla a muang ve ta deuh a, maimitchhing chungin Italian khua leh tui dik tak a nih hun tur a mitthla nasa mai.