#ZoFooty

United Kingdom-in dan khauh tak siamin red list rama zinte chu UK-a an let leh hnuah ni 10 tal khunghran (quarantine) tur an ni a, hei vang hian Premier League Club țhenkhatte chu an buai hle.

Brazil Natioal Team-ah hian Premier League player 8 lai awmin Zirtawpni zing dar 6 hian World Cup qualifying khel turin Peru an mikhual dawn a, an inkhelh zawh veleh UK pan pawh ni se an club tan an inlan thei chuang lovang.

Liverpool, Manchester City, Chelsea, Manchester United leh Leeds United te chu a tuartu turte an ni a. Liverpool player tam berin Roberto Firmino, Fabinho leh Alisson te an awm a, City ațangin Ederson leh Gabriel Jesus an awm a, Leeds United forward Raphinha, Manchester United midfielder Fred leh Chelsea defender Thiago Silva te an awm bawk.

FIFA chuan ram tana player khelh phal lo te chu an hrem dawn avangin Club te hian an player te hi an chhuah lo thei lova, Everton forward Richarlison erawh nipui laia ram tan Olympics a khelh avangin Brazil hian ngaihhnathiamna an pe a, ani chu Club tan a inlan thei ang.

Tunkar tawp Premier League match bakah hian Chelsea defender Thiago Silva leh Manchester United midfielder Fred te chu Champions League-ah an inlan thei dawn lo bawk. United hian karleh Thawhlehni zanah Young Boys chu khualmualah an tum dawn a, Chelsea erawhin Zenit St Petersburg an mikhual thung ang.