Mizoram Premier Playoff chu khelh tan a ni dawn ta a. Vawiin hian match hnih a awm anga, match hmasa zawkah FC RS Annexe leh Chanmari West FC te an inkhel a, match hnuhnung zawkah Kanan FC leh Reitlang FC te an inkhel thung ang. Inkhel en man Rs 20/- ni mahse school naupang form ha tan chuan a free dawn a ni.

DAR 1:00: FC RS ANNEXE Vs CHANMARI WEST FC
FC RS Annexe hian City Zone Football tournament 2012-ah Aizawl FC hnehin an Champion a, Chanmari West erawh season hmasa lamah Second Division-ah an awm thung a. I-Day Tournament (2nd Div)-ah Champion in season tawpah 2nd Division bikah hian pahnihna niin an chungah SYS FC an awm a ni. Mizoram Premier League awm hma kha chuan 2nd Division hi Mizoram league sangber dawttu niin Zone football hi a hniam ber a ni thung a ni.

FC RS Annexe hi division hnuai zawka awm ni mahse team chhe zawk anni tihna a ni lova. Club din thar anih avang chauh a Zone Football khel an ni a, team kalphung mumal tak an nei a. Chanmari West hi Second Division zinga MFA Cup khel thei pahnih zinga pakhat kha an ni a. Mahse MFA Cup beisei an pha lo hle thung.

Predictions:
FC RS Annexe 2-1 Chanmari West FC
Chanmari West hi season hmasa atang khan eng ang chiahin nge an insiamthat chu hretthiam a harsa a, mahse an practice en chuan team beiseiawm tak chu an ni la ni rihlo. Mahse veng ang zawnga Central YMA final lut thei annih avangin an chhelo ang tih erawh hriat a tha. Chutihrualin FC RS Annexe hi Chanmari West FC aia team management nei tha zawk an ni a, players pawh an nei tha zawk niin a lang a. Mahse nikum lama loan a an lak Reuben-a squada kan hmuh hma chuan ball sem tu an la tlachham a tih theih a. Striker goal thun thei an neihloh bawk avangin goal an thun tam a rinawmloh.

DAR 3:00 : KANAN FC VS REITLANG FC
Kanan FC hi Season hmasa khan Second Division-ah an awm a, tournament pahnih laiah final lut mahse final-ah an vanduai ve ve a. Season tawp kha chuan pathumna an ni thung. Reitlang FC erawh Kanan FC te khelh theihloh MFA Cup khel thei a, thleng sang lo mahse team pangngai tak an ni tih a lang thung a. CYMA-ah Reiek angin player engemaw zat an khel a, hetah pawh hian Shillong Group hnehloh nghal mahse an vanduai a tih theih a. Tunah players engemawzat an lak belh avangin team beiseiawm tak chu an ni.

Predictions
Kanan FC 2-2 Reitlang FC
Kanan FC lam hi Striker an neih that avangin zuam sual awl tak tur an ni a. Striker-ah hian player tlan chak Sangbera an nei a, anni hian MFA Cup 2012-ah SYS FC a Champion pui a (Kanan FC in MFA Cup an khelh theihloh avangin SYS FC lam hian reinforcement in an la). Anni bakah hian nikum lama Luangmual FC a khel Puia te an neih bawk avangin goal an thun ngei a rinawm. Mahse Kanan hi Joint YMA Field, Vaivakawn lo ah hi chuan performance tak tak an nei theilo an tia, a thleng dik zawk angem tih hi ngaihtuah tham a ni.
Reitlang FC erawhin players langsar han sawi tur an nei hran lova. Experience player Vannunmawia leh Zion-a te bak chu hming nei lian an awm lo. Chuti chung chuan beiseiawm pawlah chhiar loh theihloh an ni a, team management a felfai a. Coach Chawnga kaihhruaina hnuaiah team game pangai tak an khel thei a, an fitness a that bawk avangin a tawp thleng game ngai reng an khelh theih a rinawm.