Vawiin tlai khan Kolkata khawpuia Leslie Claudis Street – ah East Bengal fans 5000 vel pungkhawmin an club official te lakah lungawilohna an lantir. Fans pungkhawm zingah an club official te tan an awm avangin fans leh fans inkarah buaina chhuakin police in an hnawtdarh a, mi 50 vel manin mi 10 vel damdawi ina hruai an ni bawk niin Sportskeeda chuan a tarlang.
Fans pungkhawm te hian an club leh Shree Cement te’n inremna an siam thei lo chu an duh lo a, inrem thuai a CFL leh ISL khel thei tur a inpuahchah vat an duh ber niin a lang.
East Bengal a thil ti thei tak Debabrata Sarkar, Nitu Da an tih bawk chuan fans te pungkhawm chu a hriatthiam loh thu sawiin,“Inremna hi ziah kan duh a mahse club tana tha ber tur hi ngaihtuah tel a ngai a ni. Fans te pawh hi thil mumal zawk a sawipui theih kan duh khawp mai. Keini chuan club tana tha ber tur zelin thil kan ti ang,” tiin a sawi.
Hetihlai hian AIFF General Secretary Kushal Das chuan East Bengal leh Shree Cement inkara buaina awm chu an club chhungkaw thil a nih avangin AIFF tan inrawlh a rem loh thu a sawi.
Tarlan fo tawh angin Calcutta Football League chu August thla chawhnu lam atang hian khelh a ni dawn a, hei bakah hian November ni 19 atanga khelh tan tur ISL atan club hrang hrang an bazar mek a, heng inelna pahnih ah hian East Bengal hi an inlan thei dawn em tih chu a la chiang thei lo a ni.
