Champions League-ah pawh Spanish club pahnih intum thei an nih laiin, Semi-final ah Spanish club pahnihte hi an tla ta thung a. Europa League-ah erawh Spanish club pahnih chuan an khelhpuite hneh ve vein final an thleng thung a ni.

Athletic Bilbao chuan Sporting Lisbon hnehin final an thleng a, Spanish club dang Atletico Madrid pawhin Spanish club dang Valencia an hneh a, final an thleng bawk a ni.

2-1 a first leg-a an chak loh hnuah Bilbao hian second leg-ah thapui an thawh a. Minute 17-naah Markel Susaeta chuan goal hmahruai a khung a. Hemi hnu hian rei lo te chhungin, Ricky van Wolfswinkel chuan Sporting tan an si phurh a rawn sut a, mahse Bilbao tan Gomez Ibai chuan goal rawn khung ve lehin, score belhkhawm 3-3 a ni ta.

Hun rei tak chhung goal an inpe thei lova, mahse hun tawp hma minute 2 chiah a la awm tihin tunlaia striker form ber zinga mi Fernando Lloriente chuan goal a rawn khung a, Bilbao an chak phah ta a ni.

Atletico Madrid chuan Velancia kha 4-2 a an va hneh avangin hna awlsam tak an thawk thei a. Second leg-ah 1-0 in, Adrian-a goal hmangin an chak a, 5-2 (agg) a chakin final an lut a. Amaherawhchu an captain Thiago chuan tul lo takah red card a hmu a, May ni 9 a final khelh hunah a khel ve thei lovang.